Descobren a parella de buratos negros supermasivos máis próxima á Terra

Está localizada na constelación de Acuario, a uns 89 millóns de anos luz do planeta azul, cando o récord anterior estaba en 470 millóns

Vistas en primeiro plano (esquerda) e de amplio campo (dereita) dos dous núcleos galácticos brillantes que albergan, cada un, un burato negro supermasivo. / ESO/Voggel et al
Vistas en primeiro plano (esquerda) e de amplio campo (dereita) dos dous núcleos galácticos brillantes que albergan, cada un, un burato negro supermasivo. / ESO/Voggel et al

Rompen o récord. Un equipo de astrónomos descobre a parella de buratos negros supermativos máis próxima á Terra. Está situada na galaxia NGC 7727 e máis en concreto na constelación de Acuario, a tan só 89 millóns de anos luz do noso planeta. E aínda que a distancia parece ser inabarcable, supera con creces o récord anterior. Ata hai nada, o par de buratos negros que máis preto estaba de nós situábase a 470 millóns de anos luz. Para detectar esta parella empregouse o Very Large Telescope do Observatorio Europeo Austral, situado en Chile.

Ademais, este achado rompe outro récord. Os encontrados en NGC 7727 baten a marca da separación máis pequena entre dous buratos negros supermasivos, xa que están a só 1.600 anos luz de distancia entre eles. Máis polo miúdo, estes elementos espaciais escóndense no centro de galaxias masivas, e cando dúas delas se fusionan, os buratos negros tamén rematan colisionando. Os resultados deste novo achado acaban de ser recollidos nun artigo publicado na revista Astronomy & Astrophysics.

Futura fusión

Segundo recolle a Axencia SINC, a principal asinante da investigación é a astrónoma Karina Voggel, que traballa no Observatorio de Estrasburgo. “É a primeira vez que atopamos dous buratos negros supermasivos que están preto o un do outro, menos da metade da separación do posuídor do récord anterior”, sinala a investigadora. A estas palabras únese outro dos autores, o profesor da Universidade de Queensland Holger Baumgardt: “A pequena separación e a velocidade dos dous buratos negros indican que se fusionarán nun burato negro monstruoso, probablemente dentro dos próximos 250 millóns de anos”.

Durante o seu estudo, tanto Voggel como o seu equipo puideron determinar as masas dos dous obxectos observando como inflúe a atracción gravitacional que xeran os dous no movemento das estrelas que hai ao seu arredor. Descubriuse, ademais, que o burato negro máis grande, ubicado xusto no núcleo da galaxia, tiña unha masa case 154 millóns de veces que a do Sol, mentres que o seu compañeiro se situaba nos 6,3 millóns de masas solares.

Minuciosas observacións

A maiores de todo o anterior, esta é a primeira vez que se miden, desta maneira, as masas de buratos negros supermasivos. Unha fazaña posible grazas á proximidade do sistema á Terra e ás minuciosas observacións que o equipo obtivo dende o observatorio chileno. A comunidade astronómica xa sospeitaba que a galaxia albergaba dous buratos negros, pero non puidera confirmar a súa presenza ata o momento.

“O noso achado implica que podería haber moitas máis destas reliquias froito de fusións de galaxias aí e poden conter moitos buratos negros masivos ocultos que aínda esperan ser encontrados”, sinala Voggel. “O número total de buratos negros supermasivos coñecidos no universo local podería aumentar nun 30%”, engade a investigadora. Espérase, ademais, que a busca destes elementos dea un salto co Telescopio Extremadamente Grande que comezará a funcionar a finais desta década en Chile.


Referencia: First direct dynamical detection of a dual super-massive black hole system at sub-kpc separation. (Publicado en Astronomy & Astrophysics).

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.