Concepción Pérez Lamela, investigadora do campus de Ourense. Foto: Duvi.
Concepción Pérez Lamela, investigadora do campus de Ourense. Foto: Duvi.

A investigadora Concepción Pérez, no Grupo Europeo de Investigación en Altas Presións

Concepción Pérez Lamela, investigadora da Área de Nutrición e Bromatoloxía do Departamento de Química Analítica e Alimentaria da Universidade de Vigo, incorpórase ao Grupo Europeo de Investigación en Altas Presións. O seu nomeamento, proposto no último congreso anual da entidade, recoñece o seu traballo no procesado de alimentos mediante esta técnica ao longo de dúas décadas.

O Grupo Europeo de Investigación en Altas Presións (EHPRG) naceu en 1963 a iniciativa dun grupo de científicos e enxeñeiros involucrados na investigación en altas presións, que decidiron reunirse anualmente para o intercambio de coñecemento e o fomento da investigación neste eido, “unha disciplina de rápido crecemento con resultados aplicables a moi diversos campos da ciencia, a tecnoloxía e a biotecnoloxía”, segundo indican desde a propia entidade. Foi precisamente no último encontro deste comité, que reuniu a principios de setembro en Aveiro, Portugal, a arredor de 200 expertos e expertas procedentes dun amplo abano de países, cando o presidente do congreso, Jorge Aleixandre Saraiva, profesor na Universidade de Aveiro, propuxo a Concepción Pérez Lamela para substituílo como membro deste grupo europeo, seguindo as normas da entidade.

A técnica de altas presións pode mellorar a calidade nutritiva dalgúns alimentos 

Aceptada a súa proposta no congreso, a profesora da Facultade de Ciencias do campus de Ourense formará parte do grupo representando a área de alimentos procesados mediante altas presións hidrostáticas, cargo que ocupará ata setembro de 2021. “Estou moi contenta por este nomeamento”, comenta Concepción Pérez Lamela. Segundo lembra, en 1998 empezou a traballar nesta liña de investigación na Universidade de Reading, en Reino Unido. Desde entón, apunta, esta liña de investigación sempre estivo presente na súa traxectoria en combinación con outras desenvolvidas pola Área de Nutrición e Bromatoloxía. “Investigamos sobre o procesado de alimentos mediante tecnoloxías de altas presións, modificacións sensoriais, encimáticas, nutritivas e microbiolóxicas e compoñentes minoritarios en alimentos”, comenta a investigadora.

Así, detalla Pérez Lamela, na actualidade “traballamos no desenvolvemento de produtos vexetais sometidos a altas presións”. A aplicación neles de altas presións, comenta a investigadora, non degradan compoñentes minoritarios, como poden ser vitaminas, polo que se mellora a súa calidade nutritiva, pero si modifican características sensoriais, que poden verse melloradas ou empeoradas. Ademais de en vexetais, outros grupos de alimentos sobre os que teñen estudado a aplicación de altas presións para a súa conservación son os lácteos, os pescados e mariscos e as carnes.

A investigadora, doutora en Farmacia, fai fincapé tamén na importancia da perspectiva de xénero. Neste senso, recalca á hora de valorar a súa elección como “é importante que as mulleres esteamos máis visibles na ciencia e nos seus órganos de goberno, maioritariamente constituídos por homes”. Aínda que na súa área de traballo, de altas presións aplicadas a alimentos, a porcentaxe de mulleres é máis elevada que noutras, Pérez Lamela lembra como as cifras deixan patente “como a muller está infrarepresentada” en comités, premios e eidos similares.

DEIXAR UNHA RESPOSTA

Please enter your comment!
POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.

Please enter your name here

Este sitio emprega Akismet para reducir o spam. Aprende como se procesan os datos dos teus comentarios.