Do mesmo xeito que nós nos preparamos para dicirlle adeus ao ano 2021, o cometa Leonard vén despedirse tamén de Galicia. Desde o país, o obxecto celeste será visíbel no ceo desta noite, uns minutos após o solpor e moi preto da liña do horizonte. Amais, as favorábeis condicións meteorolóxicas destes días facilitarán o seu avistamento desde o territorio peninsular.
Características do cometa
Oficialmente coñecido como Comet C/2021 A1, esta gran rocha de xeo, po e gas foi descuberta o 3 de xaneiro deste ano, polo astrónomo Gregory J. Leonard, desde o Observatorio do Monte Lemmon, nos Estados Unidos, sendo o primeiro cometa albiscado este ano.
Como a meirande parte dos cometas, que xorden no bordo xeado do noso sistema solar, o cometa é orixinario da nube de Oort, un enxame de bólas xeadas. Estes fanse visíbeis só para nós mentres viaxan polo interior de dito sistema, especialmente cando, a medida que se aproximan á estrela, forman un ronsel con parte do seu material, o que xera un halo ao redor do obxecto. Así, po e gas corren detrás dos cometas para formar as súas extremadamente longas colas.
Mais nunca tan longas como as súas órbitas. No caso de Leonard, está estimado que o cometa tarde uns 80.000 anos en completar unha viaxe ao redor do Sol. Con todo, o obxecto celeste está clasificado como ultrarrápido, a raíz da gran velocidade á que se estaría movendo polo noso sistema planetario: uns 71 quilómetros por segundo. Secasí, permanecerá visible para o ollo humano, debido á súa distancia respecto da Terra, mesmo parecerá moverse lentamente.
Leonard no ceo desta semana
No que respecta ás condicións atmosféricas idóneas para unha mellor observación, a influencia anticiclónica destes días facilitará o atoparmos ceos despexados, polo que só é preciso buscar un lugar libre de contaminación luminosa para tentar ser quen de contemplar o seu paso co ollo nú. Con todo, a NASA recomenda o uso de prismáticos para tentar albiscalo no ceo, xa que pode parecer unha “estrela borrosa”.
Débese buscar en dirección sudoeste do ceo peninsular, no que esta semana Xúpiter, Saturno e Venus forman un brillante trío cara ao sur e, á súa esquerda, a Lúa se atopa en fase crecente. Xunto a estes, Leonard pasará entre a constelación da Osa Maior e Arturo, a terceira estrela máis brillante do ceo nocturno que forma parte da constelación do Boieiro. Con todo, grazas á ferramenta de visualización do ceo do Instituto Geográfico Nacional (IGN) pode terse unha mellor idea de onde e como ver o cometa, segundo a localidade aproximada desde a que se observa.
Unha viaxe que continúa
O obxecto celeste, que probabelmente teña pasado os últimos 35.000 anos viaxando cara ao sol, alcanzaba o pasado día 12 o punto máis próximo á Terra, orbitando a unha distancia de 34 millóns de quilómetros do noso planeta. Tras esta, a súa próxima parada no noso sistema solar será Venus, o 18 de decembro, sendo aínda visíbel desde a Terra, se ben para nós o seu resplandor irá diminuindo a medida que se afaste.
Deste xeito, a desta semana convértese na última oportunidade para albiscar este cometa, posto que, segundo a NASA, o próximo 3 de xaneiro Leonard estará alcanzando o seu perihelio, sendo o momento de maior proximidade ao Sol. Cando máis preto desta estrela se atopan, máis brillan os cometas, polo que as semanas previas a este evento fan que o cometa sexa máis fácil de ver. Tras este, continuará até o seu afelio, cando máis lonxe estea da nosa estrela, deixando atrás o Sistema Solar.
En caso de botalo de menos, podes seguir a conta de twitter do cometa (@Comet2021a1) para consultar información actualizada de forma constante, amais de visualizar imaxes e vídeos feitos por profesionais ou afeccionados.