Venres 29 Marzo 2024

Premio de Transferencia en Galicia a un proxecto para facer fariña co sangue dos matadoiros

O Departamento de Enxeñaría Agroforestal da USC, a spin-off xurdida dos laboratorios universitarios composteláns HGBeyond Materials Science e a BorgWarner Emissions Systems Spain, en colaboración coa UVigo, acadaron os III Premios de Transferencia de Tecnoloxía en Galicia promovidos pola Real Academia Galega de Ciencias coa colaboración da Axencia Galega de Innovación da Xunta (GAIN). Estes galardóns recoñecen as mellores prácticas de transferencia de coñecemento procedente dos organismos de investigación ao tecido produtivo.

Responsables do proxecto de converter sangue en fariña:esquerda José Manuel Magide e á dereita Hiram Varela.
Responsables do proxecto de converter sangue en fariña: esquerda José Manuel Magide e á dereita Hiram Varela.

Na modalidade ao mellor traballo desenvolvido por un grupo de investigación aplicada, dotado con 6.000 euros netos e unha axuda de 4.000 euros para a formación dun dos investigadores, o galardón recaeu no Departamento de Enxeñería Agroforestal da USC, no Campus de Lugo, en colaboración co enxeñeiro de industrias alimentarias Hiram Varela.

Publicidade

O obxecto principal do proxecto é a posta en valor dun residuo gandeiro, o sangue procedente dos matadoiros, a través da súa transformación en fariña de alta calidade, cun amplo abano de usos que van dende a fabricación de pensos para animais, fertilizantes agrícolas e aditivos alimentarios ata cosméticos, pegamentos, extintores antiincendios e emulsións asfálticas.

A tecnoloxía que fai posible esta transformación foi patentada este ano e supón non só unha alternativa á retirada do sangue dos matadoiros, con elevados custos de xestión de residuos, senón a produción dun recurso de alto valor engadido, a fariña, que nos Estados Unidos se cotiza por enriba dos 1.100 dólares por tonelada.

A fariña feita con sangue ten unha altísima cotización nos Estados Unidos

A transformación do sangue en fariña é unha actividade residual en España, con resultados de moi baixa calidade xa que o proceso habitual é aplicar temperaturas elevadísimas que deterioran a calidade das proteínas. A tecnoloxía galardoada caracterízase por ser capaz de producir a fariña tratando o sangue a baixa temperatura, o que non só preserva as súas propiedades orixinais senón que supón un custo enerxético reducido. A máquina deseñada para facelo posible xa espertou o interese de matadoiros de toda España.

Lentes medicadas
Na categoría de Pemes, o premio ao mellor caso de éxito empresarial de transferencia de tecnoloxía, dotado con 12.000 euros, correspondeulle a HGBeyond Materials Science. Esta spin-off nacida na Universidade de Santiago de Compostela en 2015 baixo o nome Lentimed, desenvolveu en colaboración co Grupo I+D Farma da USC, hidroxeles para a liberación de substancias activas no organismo. O seu primeiro desenvolvemento é unha lente de contacto capaz de liberar fármacos e outras substancias activas na superficie ocular. O pasado mes de outubro, HGBeyond recibiu tamén o Premio Galicia Spin-off, que conceden GCiencia e Banco Pastor, na categoría Idea Emerxente.

A tecnoloxía que soporta este achado está patentada en Europa, Estados Unidos e Xapón, países nos que se concentra o 70% dos 125 millóns de usuarios de lentes de contacto no mundo.

Equipo de Borg Warner.
Equipo de Borg Warner.

As aplicacións, que nun futuro se prevé ampliar, céntranse, en primeiro lugar, na produción de lentes de contacto brandas máis confortables a partir de hidroxeles, capaces de evitar a sequidade e a irritación que con frecuencia provocan o abandono deste tipo de correctores de visión por parte dos seus usuarios. O outro produto que a empresa ten previsto lanzar ao mercado internacional son as lentes de contacto con fármacos incorporados, deseñadas para liberar as substancias terapéuticas nas doses precisas ao longo de días ou semanas. Isto último supón unha alternativa ás formas clásicas de administración de medicamentos para doenzas oculares, coa garantía de que o fármaco non se perde no fluído lacrimal e o usuario non esquece administralo.

O terceiro dos premios concedidos foi na categoría de mellor caso de éxito de transferencia de tecnoloxía na categoría de grandes empresas para BorgWarner Emissions Systems Spain quen, en colaboración co grupo de Tecnoloxía Enerxética de UVigo, desenvolveu unha ferramenta innovadora para o deseño e validación dos sistemas anticontaminación en motores de combustión interna de vehículos que implantará en todas as fábricas que ten repartidas polo mundo.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Convocado o IX Premio de Xornalismo Científico Celia Brañas

Os traballos poden enviarse a partir do 15 de abril. A dotación económica do galardón será de 5.000 euros, cun accésit para o segundo mellor valorado

Aberto o prazo de inscrición para os Premios á Transferencia de Tecnoloxía 2023

As candidaturas poderán presentarse ata o 15 de abril de forma telemática

ODS-Protein, avanzando cara á alimentación do futuro

A innovación no sector alimentario ten un amplo horizonte de crecemento...

3eData, novas tecnoloxías para obter información completa sobre o territorio

A start-up lucense aproveita os drons e o Big Data no deseño de novas ferramentas para o sector agroforestal