Únete á nosa canle de Whatsapp
O Consello Superior de Investigacións Científicas (CSIC) entregou esta fin de semana no Museo Casa de la Ciencia de Sevilla os premios da sétima edición de Inspiraciencia, o concurso de relatos de inspiración científica que organiza xunto á Fundación Española para la Ciencia y la Tecnología (Fecyt) e outras entidades.
Como todos os anos, o organismo entrega os galardóns aos relatos participantes en cada unha das linguas oficiais do Estado. Tamén se concedeu unha mención a dous finalistas por idioma e, como novidade deste ano, dous accésit Feynman, para conmemorar o centenario do nacemento do famoso físico e divulgador. Por outra banda, Inspiraciencia tamén entregou o premio do público nas categorías adulto e xuvenil, que se votaron a través de internet.
Estes foron os gañadores do certame en galego:
– Primeiro premio adulto: Por un puñado de SNPs, de Adrián Casanova Chiclana, de Monforte de Lemos.
– Finalista adulto: Vida, de Javier García Bello, de Sada.
– Primeiro premio xuvenil: Sempre no meu corazón, Ada, de Julia Nieto Mantiñán, de Betanzos.
– Finalista xuvenil: Información, de Rodrigo Justo Fernández, de Verín.
No xurado para a lingua galega participaron Gonzalo Hermo, poeta e profesor asociado de galego na universidade Autónoma de Barcelona, Alba Losada Cuquejo, lectora de galego na mesma universidade, e Pura Salceda, representante da Asociación de Escritores en Lingua Galega, escritora e tradutora.
