Un dos membros da base Concordia, na Antártida. Foto: esa.int.

Un dos membros da base Concordia, na Antártida. Foto: esa.int.

Buscan científicos dispostos a vivir durante un ano na Antártida

A Axencia Espacial Europea procura investigadores médicos voluntarios para estudar a adaptación do ser humano a condicións extremas

A máis de 3.000 metros de altura e moi preto do polo Sur, na Antártida, está a estación Concordia, un dos lugares máis hostís nos que o ser humano se empeñou en estar. A temperatura media é de -51°C, que “sobe” ata -30 °C no verán e cae ata os -60 °C durante o inverno, aínda que se pode chegar a cotío a baixar dos -80 °C. Alí está na actualidade Carmen Possnig, unha científica que, segundo explica a Axencia Espacial Europea (ESA), “é unha especie de astronauta” facendo experimentos na Terra. Carmen traballa xunto a preto de 20 científicos que viven alí durante o inverno, case sen luz solar, prácticamente incomunicados e á espera da chegada do equipo de verán, máis numeroso, que está a piques de comezar a súa estadía.

A base Concordia está a 3.000 metros de altitude e no exterior hai unha temperatura media de -51°C

Carmen Possnig xa ten substituta: a doutora danesa Nadja Albertsen, que se está preparando no centro para astronautas que a ESA ten en Colonia (Alemania), debido ás duras condicións ás que se ven sometidos os investigadores por permaneceren tanto tempo nun ambiente tan xélido e hostil. Pero despois de Albertsen, a misión debe continuar, e a Axencia Espacial Europea acaba de lanzar un concurso para buscar investigadores médicos que queiran pasar un ano (entre finais de 2019 e finais de 2020) vivindo na estación Concordia.

A investigadora Carmen Possnig, traballando na base Concordia da Antártida. Foto: esa.int.

A investigadora Carmen Possnig, traballando na base Concordia da Antártida. Foto: esa.int.

“O traballo que fan os nosos doutores na Antártida é indispensable para preparar as futuras expedicións espaciais”, sinalou Jennifer Ngo-Anh, unha das responsables do programa. Do mesmo xeito que está facendo Carmen e fará Nadja, os científicos que viaxen ao Polo Sur deberán facer experimentos e estudar como estas condicións inflúen no seu propio corpo: no cerebro, ou na presión sanguínea, ademais de ver cómo os organismos poden adaptarse ás situacións extremas para as formas de vida que coñecemos na Terra.

“O entorno é duro, e a experiencia non vai ser coma un paseo polo parque, pero serás parte da exploración humana do Sistema Solar, e garantizamos que nunca vas esquecer isto“, din desde a ESA.

Condicións

Entre os requisitos, a ESA subliña que a investigadora ou investigador debe ter un doutoramento en ciencias médicas e experiencia laboral no eido; gran interese pola investigación médica e psicosocial, experiencia de laboratorio, moi bo nivel de inglés, ademáis de recomendar bo nivel de francés e italiano (xa que a instalación forma parte do programa polar destes dous países), unha excelente saúde e condición física, ningún tipo de adiccións, e ser cidadán ou residente nun país membro da ESA. Terase tamén en conta a experiencia previa en entornos salvaxes e extremos, así como o coñecemento da investigación espacial.

Os interesados deberán enviar o seu CV e unha carta de motivación á ESA antes do 14 de xaneiro de 2019. A partir desta información, seleccionaranse entre 3 e 5 candidatos para participar nun recoñecemento médico e psicolóico e unha entrevista persoal. Con estes resultados, o elixido comezará a súa preparación no verán de 2019 antes de partir cara a Antártida ao final dese ano.

Máis información na web da Axencia Espacial Europea.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.