A revista QUO e o CSIC presentaron este martes á Selección Española da Ciencia 2016, un equipo formado por algúns dos investigadores máis brillantes do noso país. Nesta lista figura a galega Carmen Martínez, directora do Grupo de Viticultura na Misión Biolóxica do CSIC en Galicia. É a primeira investigadora agraria que recibe este recoñecemento. Completan o equipo figuras moi destacadas da ciencia a nivel estatal: Francisco J. Martínez Mojica, microbiólogo da Universidade de Alacant e candidato ao Nobel polas súas achegas ao desenvolvemento da tecnoloxía CRISPR; Pedro Cavadas, cirurxián plástico especialista en transplantes; Mariano Barbacid, bioquímico no Centro Nacional de Investigacións Oncolóxicas (CNIO); Susana Marcos, directora do Instituto de óptica Daza de Valdés do CSIC; Alberto Ruiz Jimeno, fundador do grupo altas enerxías do IFCA; Laura M. Lechuga, profesora de investigación do CSIC no Instituto de Nanociencia e Nanotecnoloxía catalán; José Manuel Galán, egiptólogo e impulsor do proxecto Djehuty; Juan José Gómez Cadenas, investigador do CSIC no IFIC e director do experimento Next; Mariano Esteban, Presidente da Real Academia Nacional de Farmacia e investigador do CSIC; Mara Dierssen, investigadora do Centro de Regulación Xenómica de Barcelona; Miguel Delibes de Castro, investigador na Estación Biolóxica de Doñana; e Manel Esteller, director do programa de Epigenética e Bioloxía do IDIBELL.