Únete á nosa canle de Whatsapp
Cincuenta anos despois da aparición dos últimos restos humanos que se atoparon no castro da Lanzada, en Sanxenxo, o equipo de arqueólogos que desenvolve nos últimos anos as escavacións no lugar atopou en só dous días de setembro de 2016 dous esqueletos separados por apenas seis metros de distancia e lonxe da zona da necrópole onde se concentraban ata o momento os anteriores achados.
Os restos poderían datarse no século I d.C.
Nun primeiro momento deuse a coñecer a aparición dos restos dunha muller nova, que os encargados da escavación bautizaron como Cornelia. Segundo o responsable dos traballos, Rafael Rodríguez, o achado deste corpo supuxo “a confirmación da extensión da necrópole galaico-romana ata a área de ocupación, ao carón das vivendas”. Os indicios atopados nos restos apuntabam a que poderían datarse no século I despois de Cristo.
E case sen tempo para valorar a magnitude do primeiro descubrimento, a Deputación de Pontevedra anunciou ao día seguinte o descubrimento do esqueleto dun bebé duns catro meses de idade. Segundo a doutora Olalla López, da Universidade de Santiago, que tamén participaba nos traballos que se están levando a cabo na Lanzada, o achado da criatura foi unha importante novidade desde o punto de vista antropolóxico, xa que se pensa que naquela época non se enterraban os menores dun ano.
Estes dous descubrimentos supuxeron un importante pulo para a intervención arqueolóxica no Campo da Lanzada, un asentamento clave para coñecer a Idade de Ferro no noroeste peninsular. Os traballos, que se desenvolven no marco dun acordo asinado entre a Deputación de Pontevedra e o Ministerio de Fomento, pretenden triplicar a zona accesible da escavación e poñer en valor a área romana do recinto para datar con máis exactitude os restos atopados. Ata o momento xa se atoparon máis de 3.000 pezas da época romana, amais de desenterrar e consolidar estruturas romanas e castrexas.
