Explicación: esta definida instantánea telescópica capturou a Lúa das Colleitas do pasado setembro completamente mergullada na escura sombra umbral da Terra, ao comezo da eclipse lunar total. Foi a derradeira eclipse dunha tétrada, unha de catro eclipses lunares totais consecutivas. Esta cor da eclipse total, unha aparición escura da Lúa chea preto do perixeo, foi dun vermello sangue escuro, coa superficie lunar reflectindo a luz do interior da sombra da Terra que se filtrou ao través da atmosfera baixa. Ollado desde a perspectiva lunar, a luz avermellada vén de tódolos solpores e menceres ao redor dos bordos dunha Terra en silueta. Pero preto do bordo da sombra, o limbo da Lúa eclipsada amosa unha clara cor azul. O luar azul eclipsado aínda se filtra a través da atmosfera da Terra aínda que, ao orixinarse como raios de luz solar que pasan a través de capas altas da estratosfera superior, coloréase polo ozono que esparexe a luz vermella e transmite a azul.