Reflexos dos 1970s

Explicación: os 1970s son ignorados ás veces polos astrónomos, como este fermoso grupo de nebulosas de reflexión de Orión (NGC 1977, NGC 1975 e NGC 1973), normalmente desdeñados en favor do brillo máis intenso da gardería estelar achegada que se coñece preferentemente coma a Nebulosa de Orión. Estas nebulosas de reflexión, que se atopan ao longo da espada de Orión xusto ao norte do brillante complexo da Nebulosa de Orión, tamén están asociadas coa xigante nube molecular de Orión a uns 1.500 anos luz de distancia, pero están dominadas pola característica cor azul do po interestelar que reflicte a luz procedente de estrelas novas e quentes. Nesta definida imaxe en cor aparece unha parte da Nebulosa de Orión ao longo do bordo inferior co cúmulo de nebulosas de reflexión no centro do cadro. NGC 1977 estrícase por todo o eido xusto por baixo do centro, afastada de NGC 1973 (arriba á dereita) e NGC 1975 (arriba á esquerda) por rexións escuras amalloadas pola tenue emisión vermella dos átomos de hidróxeno. Consideradas xuntas, as rexións escuras suxírenlle a moitos a forma dun home correndo.