Únete á nosa canle de Whatsapp
Explicación: esta imaxe telescópica, que enmarca unha rexión brillante de emisión, mira cara a fóra do plano da nosa galaxia Vía Láctea cara á constelación Cygnus o Cisne, rica en nebulosas. Chamada popularmente nebulosa Tulipán, a nube de brillo avermellado, formada por gas e po interestelares, tamén se atopa no catálogo de 1959 do astrónomo Stewart Sharpless como Sh2-101. A uns 8.000 anos luz de distancia e con 70 anos luz de tamaño, no centro desta imaxe composta aflora unha fermosa e complexa nebulosa. A radiación ultravioleta que procede das estrelas novas e potentes do bordo da asociación Cygnus OB3, incluíndo a estrela O HDE 227018, ioniza os átomos e impulsa a emisión da nebulosa Tulipán. HDE 227018 é a estrela brillante situada preto do centro da nebulosa. Tamén está encadrado no campo de visión o micro-cuásar Cygnus X-1, unha das fontes máis potentes de raios X no ceo do planeta Terra. A súa fronte de onda de choque, tenue e curvada, dirixida por potentes chorros que proceden dun disco de acreción dun burato negro, atópase arriba e á dereita, xusto máis alá dos pétalos do Tulipán cósmico.
APOD en vivo: charliña sobre as fotos do ano 2016 na Coruña, Vigo e Pontevedra.
