Únete á nosa canle de Whatsapp
Explicación: que está a acontecer na nebulosa Estatua da Liberdade? Están a formarse e ceibar estrelas brillantes e moléculas interesantes. A complexa nebulosa reside na rexión de formación estelar chamada RCW 57. Esta imaxe exhibe nós densos de pó interestelar escuro, estrelas brillantes que se formaron nos últimos millóns de anos, eidos de gas hidróxeno brillante ionizado por esas estrelas e gandes bucles de gas expulsado polas estrelas que están a morrer. Un estudo polo miúdo de NGC 3576, tamén coñecida coma NGC 3582 e NGC 3584, descubriu polo menos 33 estrelas masivas nos estadios finais de formación e a presenza clara de moléculas complexas de carbono coñecidas coma hidrocarburos aromáticos policíclicos (PAHs). Cóidase que os PAHs son creados no gas frío das rexións de formación estelar e o seu desenvolvemento na nebulosa de formación do Sol hai cinco milleiros de millóns de anos pode ter sido un chanzo importante no desenvolvemento da vida na Terra. A imaxe publicada foi tirada desde o Observatorio Interamericano de Cerro Tololo de Chile.
