Explicación: o centro da nosa galaxia Vía Láctea está agochado dos ollos curiosos dos telescopios ópticos polas nubes escuras de po e gas. Pero nesta vista impresionante, as cámaras en infravermello do Telescopio Espacial Spitzer furan gran parte do po desvelando as estrelas da ateigada rexión do centro galáctico. A detallada imaxe en falsa cor, un mosaico de moitas instantáneas máis pequenas, amosa as estrelas maiores e frías en cores azuis. As nubes de po de brillo avermellado están asociadas con estrelas novas e quentes nas garderías estelares. Só foi recentemente que se atopou que o propio centro da Vía Láctea era quen de formar estrelas recén nadas. O centro galáctico atópase a uns 26 000 anos luz de distancia, cara a constelación de Sagittarius. A esa distancia, a imaxe abarca uns 900 anos luz.