Explicación: as sombras fondas crean contrastes marcados entre a luz e a escuridade neste primeiro plano de alta resolución da superficie marciana. Gravado o 24 de xaneiro de 2014 pola cámara HiRISE a bordo da nave Mars Reconnaissance Orbiter (ou Orbitador de Recoñecemento de Marte), a escena abarca uns 1,5 quilómetros. Desde unha altura de 250 quilómeros sobre o planeta vermello a cámara mira un eido de dunas de area nun cráter das terras altas meridionais. Captada cando o Sol estaba uns 5 graos sobre o horizonte local, só as cristas dunares estaban alumeadas por completo. Un inverno longo e frío está a chegar ao hemisferio meridional e as cristas brillantes de xeada estacional perfilarán as dunas marcianas.