A luz, a escuridade mailo poeirento

Explicación: esta paisaxe chea de cor abarca unhas tres lúas cheas (1,5 graos) a través dos eidos estelares ricos de nebulosas ao longo do plano da nosa Vía Láctea na norteña constelación real de Cepheus. Preto do bordo da masiva nube molecular da rexión, a uns 2.400 anos luz de distancia, atópase a brillante e avermellada rexión de emisión Sharpless (Sh) 155 na parte superior esquerda, tamén coñecida coma a nebulosa Cova. Cuns 10 anos luz de diámetro os bordos brillantes da cova cósmica de gas son ionizados pola luz ultravioleta das estrelas novas e quentes. As nebulosas azuis e poeirentas tamén abundan no lenzo interestelar debido ás densas nubes escuras de po. O núcleo longo da nebulosa Lynds Dark (LDN) 1210 ancora á escea na parte inferior dereita. As exploracións astronómicas desvelaron outros signos espectaculares de formación estelar, incluíndo a manchiña vermella e brillante de Herbig-Haro (HH) 168. Directamente por baixo da brillante nebulosa Cova, a emisión do obxecto Herbig-Haro é xerada polos chorros potentes dunha estrela recén nada.