Xoves 28 Marzo 2024

Ángeles Alvariño, a ferrolá que abriu rutas na Oceanografía

A científica galega fixo carreira nos Estados Unidos e descubriu 22 novas especies de criaturas mariñas

 

Aínda que faleceu no ano 2005, Ángeles Alvariño segue a navegar. Porque aínda da nome a un buque oceanográfico, como tantos nos que se embarcou ao longo da súa carreira. Oceanógrafa, profesora e mesmo escritora, deixou fonda pegada polos seus traballos. Nada en Serantes (Ferrol) en 1916, xa desde cativa tiña inquietudes intelectuais. Rematou o bacharelato coas súas disertacións: “Insectos Sociales” e “Las mujeres en El Quijote”. En 1934, comeza a carreira de Ciencias Naturais en Madrid. E, tras o paréntese da Guerra Civil, licénciase, imparte clases e remata o doutorado. En 1950, obtén praza no Instituto Español de Oceanografía en Vigo.

Ángeles Alvariño co doutor Ya-Qu Chen de Shanghai.
Ángeles Alvariño co doutor Ya-Qu Chen de Shanghai.

Tres anos máis tarde, en 1953 obtén o “pasaporte” cara ó prestixio internacional: recibe unha bolsa do British Council para investigar en Plymouth (Inglaterra) e comeza a participar en expedicións científicas polo Atlántico e o Pacífico en buques oceanográficos de EEUU, España, Reino Unido e México. No ano 1956, pasou a investigar no Instituto Oceanográfico Woods Hole en Massachusetts. Máis tarde, no Instituto Scripps de Oceanografía, en La Jolla (California); e tamén no Servizo Nacional de Pesca Marítima dos EEUU.

Publicidade

Ángeles Alvariño nun Simposio de Oceanografía Biolóxica en San Salvador.

Ó longo da súa carreira, Alvariño descubriu doce novas especies de quetognatos e nove de sifonóforos. Os uns e os outros, cos seus nomes raros, son minúsculos depredadores que forman parte do plancton. Tamén describiu unha nova especie de medusa. En total, Ángeles Alvariño atopou 22 novas especies para a ciencia.

Foi membro da San Diego Society of Natural History, así como da Biological Society of Washington e da Asociación Hispanoamericana de Investigadores en Ciencias Mariñas. Ademais do seu labor como investigadora, Alvariño tamén dedicou moito tempo a educar aos futuros biólogos mariños, impartindo clases na Universidade Nacional Autónoma de México en 1976, na San Diego State University de 1979 a 1982 e, despois, na Universidade de San Diego, de 1982 a 1985.

Ángeles Alvariño no seu despacho.

Foi tamén profesora visitante na Universidade Federal de Paraná, en Brasil en 1982 e no Instituto Politécnico Nacional de México, desde 1982 a 1986. Xubilada oficialmente en 1987, Alvariño dedicou os últimos anos da súa vida á historia da ciencia. Retomaba así o seu gusto, que viña de cativa, pola lectura e a escritura. Levou a cabo unha intensa investigación sobre a Expedición Malespina, a primeira científica oceánica, que viaxou polo Atlántico e o Pacífico, de 1789 a 1794. Ángeles Alvariño faleceu en 2005 en La Jolla, en California. Desde febreiro de 2012, un buque oceanográfico do Instituto Español de Oceanografía leva o seu nome.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Un mapa da NASA alerta da subida do mar en Galicia e revela as zonas máis afectadas

Unha ferramenta dixital baseada nos datos científicos do Sexto Informe do IPCC ofrece unha proxección sobre as subidas do nivel do mar en todo o mundo ata 2150

A gran eclipse solar de abril: cando e onde vela en Galicia?

Este fenómeno astronómico será visible de maneira parcial no oeste da comunidade, especialmente na franxa atlántica da Coruña e Pontevedra

O mapa dos ‘químicos eternos’ en Galicia: ata 70 zonas sospeitosas de grave contaminación

Unha investigación europea sinala a presenza no continente destas substancias nocivas para o medioambiente e a saúde

Identificado un novo campamento romano na fronteira entre Galicia e Portugal

Un equipo de arqueólogos detecta un posible recinto fortificado de tres hectáreas de extensión datado entre os séculos I a.C. e I d.C.