Únete á nosa canle de Whatsapp
Numerosos veciños achegáronse na tarde do domingo pasado ás augas do río Miño na desembocadura de Camposancos, tras avistarse a presenza dun golfiño común. O animal, avistado nun primeiro momento na praia do Muíño, chegou ata a do Caldeiro, debaixo do complexo deportivo do Codesal. Axudado polos bañistas para volver á auga tras varar en numerosas ocasións, finalmente faleceu na beira do río.
Agustín Ferreira, presidente de ANABAM (Asociación Naturalista do Baixo Miño), confirmaba que se trataba dun macho adulto de golfiño común. Probablemente o exemplar, de 2,15 metros de lonxitude, sufría algunha enfermidade ou problema que o levou a desviarse da súa manada. Tamén asegurou que no Miño é algo “anecdótico” poder observar un golfiño, aínda que non é a primeira vez.
Un membro de CEMMA (Coordinadora para o Estudo dos Mamíferos Mariños) achegouse ata o lugar para recoller o animal e levalo ata o centro para estudalo e facerlle a autopsia e así coñecer con certeza a causa da morte. A necropsia realidada polos especialistas confirmou que o cetáceo padecía unha grave neumonía, caquectina e fallo multiorgánico. Todo o proceso pode verse neste vídeo publicado por Brais Martínez.
