Únete á nosa canle de Whatsapp
A BBC estoura en redes con este vídeo sobre o gato máis pequeno do mundo, que forma parte da súa serie documental de natureza Big Cats.
Se queres ver un gato ferruxento (Prionailurus rubiginosus) no seu hábitat natural deberás viaxar á India ou á illa de Sri Lanka, os únicos lugares do planeta onde vive. De todos os xeitos, non é nada fácil dar cun exemplar e non só porque sexan ananos. Poden vivir en territorios moi distintos: mentres en Sri Lanka aparecen sobre todo en zonas tropicais de altura, na India alternan montes, terreos secos e fragas.
Ademais son principalmente nocturnos e adoitan desprazarse movéndose de árbore en árbore. Ser minúsculos non impide aos gatos ferruxentos ser hábiles depredadores. Buscan e cazan pequenas aves e roedores, sen desprezar algúns anfibios e réptiles.
Necesitan moverse a toda velocidade para evitar ser presas de animais de maior envergadura. A única especie que rivaliza con eles polo título de ‘máis pequeno do planeta’ é o gato patinegro, que habita zonas do sur de África. Con todo, a maior parte das veces alcanza un tamaño superior ao dos seus ‘curmáns’ felinos.
