A pasada semana, a UVigo daba a coñecer os seus tres proxectos seleccionados dentro do programa Ignicia, que impulsa a Axencia Galega de Innovación (Gain). Nesta ocasión, a Universidade de Santiago de Compostela anunciou os tres proxectos seleccionados para esta iniciativa que pretende facilitar o acceso ao mercado das iniciativas impulsadas por investigadores galegos.
Nunha primeira fase, seleccionáronse 25 proxectos de organismos galegos, dos que só sete pasaron á última fase: tres da UVigo, tres da USC e un de Gradiant. No caso da institución compostelá, que recibiu un financiamento total de 1,3 millóns, a iniciativa con maior financiamento (838.820 euros) é Oncometa, unha investigación que desenvolve un nanosistema polimérico con prometedoras aplicacións no mundo da nanotecnoloxía. O grupo de investigación da catedrática María José Alonso encargarase deste traballo.
Por outra banda, o proxecto Matprint recibiu 241.700 euros para avanzar nunha tecnoloxía que realiza o grupo de Francisco Guitián, para a fabricación de pezas biocerámicas e catalizadores mediante impresión 3D.
O terceiro dos proxectos, denominado Reprosteatosis, recibiu 198.000 euros. Está liderado polo investigador Rubén Nogueiras e busca demostrar que un fármaco empregado hoxe en día como xenérico tamén pode ser aplicado no tratamento de esteatose hepática non alcohólica mediante unha nova formulación oral.