Alumnos do ciclo de maiores da USC: Pepe Cambeiro, María López, Fina Ramallal, Margarita Fdez Marqués e Mª Pilar Fraga, xunto ao profesor Fernando Ponte.

Alumnos do ciclo de maiores da USC: Pepe Cambeiro, María López, Fina Ramallal, Margarita Fdez Marqués e Mª Pilar Fraga, xunto ao profesor Fernando Ponte.

Un grupo do ciclo de maiores da USC presenta un traballo sobre a gripe de 1918 en Galicia

Os alumnos Pepe Cambeiro, María López, Fina Ramallal, Margarita Fernández e Pilar Fraga realizaron un amplo estudo para pescudar sobre a pandemia

Cúmprese o centenario da gripe de 1918, unha pandemia que provocou nuns meses maiores cifras de vítimas que toda a Primeira Guerra Mundial, que finalizou aquel mesmo ano. Adoita coñecerse como gripe española, xa que durante moito tempo creuse que comezara en España. Unha crenza errada que, segundo apuntas diversas publicacións, debeuse a que en países onde xa houbera casos anteriormente, como Francia e Estados Unidos, censuráronse as informacións sobre a doenza para non minar a moral dos cidadáns e os soldados.

Os alumnos analizaron os datos de numerosas vilas galegas

Coincidindo co aniversario, un grupo de alumnos do 1º curso do IV Ciclo da USC (a universidade de maiores) acaba de presentar un extenso traballo, baixo a supervisión do profesor de Historia da Medicina Fernando Ponte, no que analizan o impacto da pandemia en Galicia. Pepe Cambeiro, María López, Fina Ramallal, Margarita Fernández e Pilar Fraga, realizaron un traballo “de gran nivel”, segundo sinala o seu propio docente.

“É un traballo extenso e completo sobre a incidencia e distribución da gripe de 1918, en Galicia en particular, pero comprendendo moi ben o contexto mundial no que tivo lugar aquela tremenda pandemia”, di o profesor Ponte, que engade que “traballaron moito e ben, sorteando a dificultade de que non son, obviamente, profesionais da Medicina, con gran seriedade e responsabilidade”.

No traballo, segundo explica Fina Ramallal, unha das autoras da investigación, analizaron durante meses as hemerotecas dos xornais da época e a documentación de vilas como Ourense, Pontedeume, A Estrada, Rianxo ou Betanzos. “Detallan perfectamente todos os aspectos humanos, sanitarios e sociais, de múltiples concellos, axudando a comprender como foi aquilo e as súas consecuencias”, salienta o profesor Fernando Ponte.

Cos datos recollidos, explican, por exemplo, como a doenza chegou a Galicia desde Francia, co regreso dos temporeiros españois e portugueses que foran contratados no país galo para cubrir a carencia de man de obra debido á Gran Guerra. E contan tamén, entre outros datos, que en toda a provincia da Coruña houbo que prohibir os actos de Defuntos, e clausuráronse colexios, teatros, cines e actos públicos para evitar a propagación da gripe. Houbo que tomar tamén medidas semellantes noutras vilas como Vigo e Ourense.

A ilusión dos maiores

O IV Ciclo da USC, que se imparte en Santiago e Lugo, está dirixido a persoas maiores de 50 anos interesadas en ampliar os seus coñecementos en diversas materias. Divídese en cinco cursos, con varias asignaturas en cada un deles. “Á xente recomendaríalle matricularse porque nunca se deixa de aprender, coñecen xente con intereses semellantes e ocupan con proveito un tempo que, en moitos casos, estando xubilados, deixarían pasar sen pena nin gloria”, explica o profesor Ponte.

No mesmo sentido fala Fina Ramallal, alumna, que enumera as razóns para apuntarse a esta iniciativa: “Obrigarse a ter disciplina; un horario e unhas tarefas que cumprir, mellorar as relacións sociais, exercitar a mente, marcarse retos…”. Fina, mestra durante 40 anos da súa vida, e agora xubilada, cre que seguir aprendendo é un bo xeito de motivar tamén aos máis novos. “Os meus netos ven o meu carné de estudante e quedan sorprendidos de que siga estudando, e eu dígolles que sempre hai que ter ilusión polas cousas”.

Esta ilusión é tamén o que máis valora Fernando Ponte, quen sinala que “o feito de que persoas coa súa vida máis que resolta, con frecuencia profesionais espelidos no seu, queiran volver ás aulas para profundizar en aspectos das ciencias ou as letras nos que, ata ese momento, non tiveron ocasión de facelo”.

2 respostas a “Un grupo do ciclo de maiores da USC presenta un traballo sobre a gripe de 1918 en Galicia”

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.