Enxeñería Informática é unha carreira con pleno emprego.

Enxeñería Informática é unha carreira con pleno emprego.

Enxeñería Informática convértese na carreira sen paro

Un 92 por cento dos titulados están empregados e atopan traballo dous meses despois de rematar os estudos

Presentación do informe en Ourense.

Presentación do informe en Ourense.

En Economía, considérase “pleno emprego” unha  taxa de paro do 6 por cento. É a asumible para os que cambian dun traballo a outro (desemprego friccional) ou toman un descanso para formarse, por exemplo. Así que Enxeñería Informática é unha carreira con “pleno emprego”. Sen paro real. Porque o 92 por cento dos seus titulados están a traballar. E os que rematan a carreira só tardan 2 meses e medio en atopar ocupación.

Segundo un estudo realizado polos seus colexios profesionais, a inmensa maioría dos enxeñeiros informáticos teñen contrato indefinido e a tempo completo e traballan para o que foron formados. Unha imaxe idílica que, porén, non impide que descenda o número de alumnado matriculado nestas carreiras.

Preocupa a baixa taxa de mulleres matriculadas nesta carreira

O estudo, titulado Informe sobre a Situación Laboral das Enxeñarías en Informática, foi presentado este xoves na Escola Superior de Enxeñaría Informática do campus de Ourense nun acto que contou coa asistencia de alumnado do centro e coa participación de Ana Garriga, directora desta escola; Fernando Suárez, presidente do Colexio Profesional de Enxeñaría en Informática de Galicia CPEIG; Felicitas Rodríguez, xefa do Departamento de Sociedade da Información da Amtega, e Marcos Mata, presidente do Colexio Profesional de Enxeñaría Técnica en Informática de Galicia CPETIG. “Os datos deste informe son moi interesantes, sobre todo para o alumnado que este ano remata os seus estudos e que dentro duns meses se enfrontará ao mercado laboral”, destacou Ana Garriga. “Sodes afortunados pois como resalta o informe a profesión de enxeñeiro en informática ten unha empregabilidade elevada, o tempo para atopar un traballo é curto e a estabilidade alta”, apuntou Felicitas Rodríguez.

O perfil do enxeñeiro informático

Fernando Suárez foi o encargado de debullar as principais conclusións extraídas do informe, feito en base a 494 enquisas electrónicas realizadas a 341 colexiados do CPEIG e o resto a colexiados do CPETIG. Entre os datos obtidos, salientou a alta empregabilidade dos enxeñeiros, cun 91,77% traballando, o 80,4% deles por conta allea. A metade dos ocupados atoparon segundo o informe o seu primeiro emprego en menos dun mes e a media para que un titulado obteña o primeiro traballo é de dous meses e medio desde que comeza a busca. Como mostra da estabilidade laboral, o documento indica que o 79,35% dos enquisados ten contrato indefinido e que o 98,17% está a xornada completa, repartíndose entre o sector público e o privado.

Segundo destacou o presidente do colexio, o principal exercicio profesional destes enxeñeiros é a elaboración de proxectos informáticos, posto acorde coa súa formación e expectativas. As competencias que consideran máis importantes para o desempeño do seu traballo son a capacidade de aprendizaxe e a adaptabilidade. Ademais, subliña o informe, o nivel de satisfacción coa formación recibida na universidade é de 3,37 puntos sobre 5 e a principal motivación para realizar os estudos foi a vocación no caso dos homes (56,03%) e as saídas laborais no das mulleres (55,56%), mulleres que só representaban o 27,69% dos enquisados. Na presentación tamén se indicou que o tramo salarial máis común dos enxeñeiros e enxeñeiras en informática é o comprendido entre os 18.000 e 30.000 euros brutos ao ano.

Saídas laborais

A pesar destas desexables saídas laborais, comentou Fernando Suárez, en Galicia, ao igual que en toda Europa, as universidades non están a titular os suficientes profesionais en enxeñaría en informática como para cubrir a demanda do mercado laboral. De feito, advertiu, as taxas de matrícula están descendendo e segue a ser especialmente preocupante a falla de alumnas neste eido. “Estase perdendo un potencial enorme”, salientou o decano do CPEIG.

Por último, Marcos Mata destacou que este estudo é moi positivo para a profesión pero que hai que ter en conta que non describe a situación laboral dos non colexiados, que poderían matizar a realidade descrita no informe presentado este xoves no campus de Ourense. En todo caso, engadiu, “é necesario loitar por manter esta situación favorable” e para evitar que, por exemplo, cambios normativos mingúen os dereitos dos enxeñeiros en informática.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.