Alumnos participantes no Unistem Day.

Alumnos participantes no Unistem Day.

Unistem Day reúne 300 estudantes no maior evento europeo sobre células nai

A xornada divulgativa celebrada na USC achega a investigación aos alumnos de secundaria

Preto de 300 estudantes e profesorado dos centros Rosalía de Castro, Compañía de María, Peleteiro e Xelmírez II de Santiago e do IES García Barros da Estrada participaron dende a Facultade de Medicina da USC no evento de divulgación sobre células nai dirixido a alumnado de ensino secundario máis importante de Europa, as xornadas UniStem Day 2017. Os estudantes de Compostela súmanse así aos 27.000 rapaces e rapazas de todo o continente e que de xeito simultáneo participan ao longo deste venres en UniStem Day para poder coñecer e achegarse ao mundo da investigación e particularmente a este campo das ciencias da vida.

Un momento da presentación da xornada de Unistem Day.

Un momento da presentación do Unistem Day.

A vicerreitora de Investigación e Innovación, Isabel Rodríguez-Moldes, presidiu a sesión inaugural no Salón de Actos da Facultade. Tamén participaron o decano do centro, Juan Gestal, e o director do Departamento de Ciencias Morfológicas e do grupo de Neurobioloxía da Enfermidade de Parkinson –nodo da Rede de Terapia Celular de Galicia-, José Luis Labandeira García.

O programa inclúe, ademais de conexión por videoconferencia con outras universidades participantes, proxeccións de vídeos e xogos ou catro charlas impartidas por docentes e investigadores da USC que darán a coñecer, dende o rigor pero de forma amena, o mundo das células nai e desmontar algúns mitos construídos ao seu redor. O ABC das células nai, experimentando con células nai; ou mitos lendas e verdades sobre células nai son algúns dos títulos das intervencións programadas.

UniStem Day
UniStem Day celébrase de xeito simultáneo en 75 universidades e centros de investigación de sete países europeos, como son España, Alemaña, Dinamarca, Serbia, Hungría, Suecia e Italia, este último o pais promotor da iniciativa. En España, ademais da USC, participan outras once universidades coordinadas dende a de Barcelona. En conxunto, agárdase a participación de máis de 27.000 estudantes en todo o continente.

O grupo de Neurobioloxía Molecular e Celular da Enfermidade de Parkinson é o encargado por quinto ano consecutivo de organizar esta actividade na USC. No seu desenvolvemento conta co apoio da Vicerreitoría de Investigación e Innovación e o patrocinio de Galmedic, Glass Chemicals, Celta Ingenieros, Fisher Scientific, Grupo Merck, Editorial Panamericana, Santiago Futsal, Cafés Candelas e Gadis.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.