Únete á nosa canle de Whatsapp
Traballar en exceso pode levar ao alcoholismo. Confírmao unha investigación publicada no British Medical Journal (BMJ), que conclúe que as persoas que dedican ao seu emprego máis de 48 horas semanais son máis propensas a desenvolver esta adicción. “Algúns beben alcohol para aliviar o estrés, a depresión ou os problemas de sono”, explica Marianna Virtanen, investigadora do Instituto de saúde ocupacional de Helsinki (Finlandia) e autora principal do artigo. E, aínda que tomar unhas cervexas alivia momentaneamente a tensión, o alcoholismo ten efectos desastrosos sobre a capacidade de traballo, que inclúen absentismo laboral e ineficiencia.
A Directiva de Tempo de Traballo da Unión Europea establece un límite para a xornada laboral de 48 horas semanais, incluídas as horas extra, para protexer a saúde e a seguridade dos traballadores. Pero a realidade é que moita xente dedica demasiadas horas á súa actividade profesional por diversas razóns: para ascender, en busca dun aumento de soldo, por exceso de celo sobre o traballo ou porque así o esixe a empresa.
As longas xornadas de traballo aumentan o alcoholismo un 11%
En estudos previos xa se encontrara unha relación entre horas de traballo e risco de alcoholismo, pero eran análises con mostras reducidas. Virtanen e o seu equipo de investigación levaron a cabo a primeira revisión sistemática dos estudos que exploran este vínculo. Os resultados de todos eses traballos apuntan na mesma dirección. Nunha análise do consumo de alcohol sobre 333.693 persoas de 14 países, os investigadores encontraron que as longas xornadas aumentaban o risco de alcoholismo un 11%. Os autores da revisión non encontraron diferenzas entre homes e mulleres, distintos grupos de idade ou de status socioeconómico. Tampouco parece ser importante o lugar de procedencia.
Considérase de risco o consumo habitual máis de 14 bebidas semanais para as mulleres e 21 para os homes. Os autores recordan que esta inxestión aumenta o risco de problemas de saúde como enfermidades de fígado, cancro, derramo cerebral, enfermidade coronaria e trastornos mentais.
