O cóctel de hormonas e neuronas que se activan nos hooligans.

O cóctel de hormonas e neuronas que se activan nos hooligans.

O cóctel de hormonas e neuronas que se activa nos hooligans

Estudos científicos describen como sofre o corpo dun afeccionado cando xoga o seu equipo

Cando vemos un encontro deportivo, as neuronas espello permítennos interpretar as intencións dos xogadores ou atletas e poñernos no seu lugar. Debido á tensión, aumentan os niveis de hormonas como o cortisol e a testosterona.

Co sabor (doce para algúns e amargo para o resto) que deixou a Liga de Campións, os afeccionados ao balompé poden proseguir co seu verán futboleiro a base de partidos da Eurocopa. Pero a tempada estival garda outro agasallo para os amantes do deporte: os Xogos Olímpicos, que se celebran en Brasil, e que darán comezo o día 5 de agosto.

Tanto evento tradúcese nun aluvión de emocións para a fanaticada. O resultado dun torneo, xa se celebre sobre pista ou céspede, raramente beneficia a ambas as partes e é inevitable que algunha quede peor parada. Pero antes de saber se deben alegrarse ou decepcionarse totalmente, os fans pasan por un período de incerteza que provoca diferentes reaccións fisiolóxicas.

A experiencia resulta tan intensa porque, mentres observan atentos aos deportistas, os siareiros senten que están dentro do xogo, literalmente. Grazas ás neuronas espello, responsables da empatía, podemos meternos nos zapatos (neste caso zapatillas) do outro e identificarnos cos seus movementos coma se fosen nosos.

Mentres ti ves o partido, o teu cerebro envía sinais ao teu corpo

Este tipo de células nerviosas divídense ademais en dous tipos: as que son estritamente congruentes, que se activan cando vemos unha situación que vivimos, e as amplamente congruentes, que responden ao observar accións familiares aínda que non as experimentaramos nas nosas carnes.

Por iso, aínda que nunca practicases o deporte que estás a ver, o teu cerebro pode atopar un símil para tentar trasladarse á pista e interpretar as intencións dos participantes. Por exemplo, se nunca xogaches ao baloncesto, un acto similar ao de lanzar unha canastra sería tratar de encestar na papeleira.

Pero ademais de darlle realismo ao momento, as neuronas segregan diferentes neurotransmisores debido ao estado anímico do espectador. Se o teu equipo está a gañar o xogo, o cerebro produce dopamina que lle transmite positividade. Con todo, cando te invade a tristeza ou o mal humor porque perden os teus, aumenta a concentración de cortisol (a hormona da tensión) e de serotonina, un neurotransmisor con efectos sedantes.

Naquelas ocasións en que semella que todo vai por bo camiño, en realidade estamos en tensión. Un equipo de investigadores comprobárono hai uns anos, ao observar unha subida dos niveis de cortisol en espectadores españois seleccionados, durante a final do Mundial de Fútbol de 2010, que enfrontaba a España e Holanda. Un aumento que se detivo despois do partido, tras a vitoria do noso combinado nacional.

Os autores daquel traballo tamén detectaron un incremento na concentración de testosterona na saliva dos fans, tanto de homes como de mulleres. Os científicos cren que a reacción se produce porque nos identificamos tanto co noso equipo que sentimos coma se os estivésemos a preparar para gañar.

A concentración de testosterona aumenta tanto en homes como en mulleres

As emocións son tan intensas que ata o corazón se pode resentir no caso de persoas con problemas cardíacos. Unha investigación publicada en New England Journal of Medicine revelaba que un partido de fútbol estresante duplica as probabilidades de sufrir algún accidente cardiovascular. As súas conclusións baséanse nos datos obtidos de hospitais próximos a Múnich durante os torneos do Mundial de 2006, celebrados en Alemaña. A tensión altera o sistema nervioso e aumenta a produción de adrenalina; a hormona incrementa o ritmo cardíaco, a presión sanguínea e pode causar arritmias.

Con todo, tanta alteración emocional e fisiolóxica ten os seus efectos positivos, ademais da diversión e o sentimento de grupo. Ver deportes estimula diferentes áreas do cerebro e axuda a mellorar funcións neurolóxicas, como as relacionadas coa comunicación e a linguaxe, necesarias para utilizar o vocabulario adecuado nas discusións. Porque o bo non se acaba co encontro: despois veñen os faladoiros entre amigos.

Aquí podes atopar un estudo
sobre espectadores de fútbol e doenzas cardiacas

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.