O 'alcosynth' reduciría, segundo o seu creador, o número de mortes causadas polo alcol.

O 'alcosynth' reduciría, segundo o seu creador, o número de mortes causadas polo alcol.

Crean un alcol sintético que non deixa resaca

Científicos británicos desenvolveron o 'alcosynth' unha substancia que reproduce os efectos das bebedeiras pero non causa danos no organismo

Un grupo de científicos británicos liderados por David Nutt, investigador do Imperial College de Londres, descubriu unha substancia sintética que imitaría os efectos embriagadores do alcol pero que non intoxicaría o organismo. O ‘alcosynth’, como o denominan os seus creadores, reproduciría a mesma sensación de bebedeira que causa o etanol, pero sen os seus efectos adversos. É dicir, non máis resacas, non máis enfermidades do fígado ou do corazón, non máis problemas psicolóxicos.

O mencionado ‘alcosynth’ estaría baseado nunha benzodiazepina, un psicotrópico que xa se emprega en medicina para tratar a ansiedade, o insomnio e outras doenzas semellantes. Non en tanto, ante as implicacións económicas que tería este descubrimento para a industria das bebidas alcohólicas, o investigador mantén o máximo segredo sobre a súa fórmula. Polo de agora, haberá que esperar para probala, porque non estará no mercado ata dentro duns anos.

David Nutt, creador do 'alcosynth'.

David Nutt, creador do ‘alcosynth’.

Porén, e ante as críticas sobre os riscos de adicción a este composto, Nutt sinala que o ‘alcosynth’ non actúa cos receptores nerviosos que xeran condutas de adicción. “Coñecemos en que parte do cerebro se manifestan os bos efectos do alcol, e podemos imitalos. E se non tocamos as partes onde se experimentan eses malos efectos, non os teremos”, declarou Nutt a The Independent.

Este científico sostén que o seu invento contribuiría a paliar os problemas de saúde pública causados polo consumo de alcol. Segundo a OMS, o consumo nocivo desta droga legal está detrás de 3,3 millóns de mortes cada ano en todo o mundo. O ‘alcosynth’, según Nutt, reduciría esta cifra e, amais, podería ser unha ferramenta moi efectiva nos tratamentos de rehabilitación de alcolismo.

Amais desta substancia, David Nutt e o seu equipo tamén traballan na elaboración dunha pílula chamada chaperona, que limitaría os efectos deste alcol sintético co fin de previr situacións de posible malestar físico.

Non é a primeira vez que Nutt se sitúa no centro da controversia pola súa opinión sobre o alcol. No ano 2009, foi destituído como asesor do goberno británico en asuntos de drogodependencia tras publicar un estudo no que argumentaba que o éxtase era menos perigoso que montar a cabalo e que o alcol.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.