Xoves 28 Marzo 2024

O risco de ictus redúcese ata un 16% se vives preto de zonas verdes

Investigadores cataláns atopan que, a pesar de cumprir as limitacións europeas, os niveis de dióxido de nitróxeno e outras partículas poden ser perigosos

O risco de sufrir un ictus isquémico, o evento cerebrovascular máis común, é un 16% menor nas persoas que dispoñen de espazos verdes a menos de 300 metros das súas vivendas. Así o revela un estudo publicado en Environment International que analizou datos de poboación catalá entre 2016 e 2017, sendo o traballo máis importante neste campo a día de hoxe en Europa.

O estudo analizou o impacto dos niveis de tres contaminantes atmosféricos vinculados ao tráfico de vehículos —material particulado baixo 2,5 micras, dióxido de nitróxeno e partículas de feluxe— no lugar de residencia de cada unha das persoas estudadas. Tamén se tivo en conta o número e densidade de espazos verdes nun radio de 300 metros das súas vivendas.

Publicidade

O estudo

Os datos recollidos polos investigadores foron obtidos mediante referenciación xeográfica e mediante o deseño de modelos de exposición aos dous determinantes —contaminantes e zonas verdes— a partir de datos poboacionais obtidos mediante a reutilización de información sanitaria xerada en Cataluña e anonimizada polo polo programa de analítica de datos para a investigación e a innovación en saúde.

Proporcionalmente, cada microgramo por metro cúbico de feluxe aumenta máis o risco de ictus, seguido polo material particulado e, en terceiro lugar, do dióxido de nitróxeno

En concreto, o equipo científico seleccionou a algo máis de 3,5 millóns de persoas de entre os 7,5 millóns de habitantes da comunidade catalá. Con esta base, puideron extraer conclusións que indican unha relación directa entre o aumento dos niveis de dióxido de nitróxeno na atmosfera e o risco de accidente cerebrovascular isquémico: por cada aumento de dez microgramos por metro cúbico, o risco aumenta nun 4%.

Algo similar ocorre no caso dos outros contaminantes analizados. Mentres que o aumento de cinco microgramos por metro cúbico de material particulado baixo 2,5 micras supón un aumento do risco do 4%, as partículas de feluxe aumentan este nun 5% polo aumento dun microgramo por metro cúbico.

O risco calculado na investigación é independente de factores socioeconómicos, idade ou consumo de tabaco

Pola contra, considerouse que a exposición aos espazos verdes tiña efectos beneficiosos a través dunha variedade de mecanismos como a redución do estrés, o aumento da actividade física e o contacto social e inclusive a exposición a un microbioma enriquecido. Con todo isto, os investigadores puideron extraer que dispoñer de abundantes espazos verdes no mesmo radio da vivenda reduce directamente o risco de sufrir un ictus ata nun 16%.

É interesante sinalar que, segundo as conclusións dos autores, estas cifras son as mesmas para toda a poboación, independentemente doutros factores socioeconómicos, idade ou inclusive hábitos de consumo de tabaco. Por este motivo, os investigadores apuntan cara á implementación de medidas para reducir o uso do automóbil co obxectivo de minguar os múltiples riscos que estes contaminantes supoñen para a saúde das persoas.

Determinantes ambientais

Esta investigación foi levada a cabo de forma conxunta polo Instituto Hospital do Mar de Investigacións Médicas, o Hospital do Mar, a Axencia Catalá de Calidade e Avaliación da Saúde (AQuAS) e o Instituto de Saúde Global de Barcelona (ISGlobal), pero non é o primeiro realizado polo grupo de investigación Neurovascular do hospital, que xa achegou evidencias sobre a relación entre factores como o feluxe ou os niveis de ruído e o risco de sufrir un ictus e a súa gravidade.

Nos próximos anos, está previsto que aumente a incidencia, a mortalidade e a discapacidade atribuídas ao ictus

Carla Avellaneda, investigadora do grupo e unha das autoras principais do estudo, manifesta que este estudo vén de demostrar a importancia dos determinantes ambientais no risco do ictus. Ademais, sinala a importancia deste tipo de análises que permiten comprender todos os factores de risco implicados xa que existe a previsión de que, nos próximos anos, aumente a incidencia, a mortalidade e a discapacidade asociadas a esta enfermidade.

Máis medidas

Ante os datos extraídos da investigación, o equipo científico tamén sinala a necesidade de reflexionar sobre os niveis actuais de contaminación atmosférica considerados seguros. Polo momento, os limiares fixados pola Unión Europea (UE) son de 40 microgramos por metro cúbico para o dióxido de nitróxeno, mentres que a Organización Mundial da Saúde (OMS) reduce esta cantidade a dez.

No caso do material particulado baixo 2,5 micras, a UE estabelece un límite de 25 microgramos por metro cúbico, mentres que a OMS prefire limitalo a cinco. Actualmente non hai estabelecidos niveis para as partículas de feluxe.

A pesar de cumprir os límites fixados pola Unión Europea, os datos analizados na investigación sinalan un elevado risco para a saúde

Con todo, os niveis rexistrados durante o período analizado polos investigadores deste estudo foron, de media, inferiores aos fixados polas autoridades europeas: 35 microgramos por metro cúbico de dióxido de nitróxeno, 17 de material particulado e 2,28 no caso do feluxe.

Así, Rosa María Vivanco, investigadora de AQuAS e outra das autoras principais do estudo, sinala que, pese ao cumprimento dos niveis marcados, continúa existindo un risco para a saúde, polo que é necesario tomar moitas máis medidas, especialmente considerando o aumento na poboación urbana e o seu avellentamento.


Referencia: Air pollution and surrounding greenness in relation to ischemic stroke: A population-based cohort study (Publicado en Environment International)

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Identificada unha proteína clave na recuperación tralo ictus

En España, unha persona sofre un accidente cerebrovascular cada seis minutos

Un equipo galego usa nanopartículas para mellorar o tratamento da fase aguda do ictus

Investigadores do IDIS e da USC reducen os efectos secundarios da única terapia farmacolóxica dispoñible para abordar a enfermidade

Descuberta unha diana terapéutica prometedora fronte ás arritmias cardíacas

Un novo estudo en ratos elaborado polo CNIC abre novas vías para abordar esta afección potencialmente mortal

A contaminación aumenta o risco de sufrir un ictus a curto prazo

Unha estudo atopa unha forte asociación entre a exposición recente a contaminantes gasosos e o perigo de padecer un accidente cerebrovascular