Xoves 28 Marzo 2024

Xornalismo e divulgación

 

Cando GCiencia naceu corría 2013, un ano no que as dúas das palabras máis empregadas eran “crise” e “recortes”. Que dicir do mundo da prensa: foron tempos nos que se pecharon en España 375 medios de comunicación, cunha perda de 12.200 postos de traballo, segundo os datos do Informe Anual da Profesión Xornalística elaborado pola Asociación da Prensa de Madrid. Tras o da construción, foi o sector máis  cruelmente golpeado polo afundimento da economía. Tampouco saíu a ciencia ben parada da situación, con recortes en I+D que a Fundación   Cotec sitúa en case un 50% no período 2009-2017.

Nese contexto, un 25 de novembro botou a andar unha tolemia consistente en contar as cousas da ciencia nun medio de comunicación, unha sorte de xornal da ciencia. Un medio galego e en galego, por máis datos, decidido a desafiar os pésimos  vaticinios dos agoreiros. Se os grandes non resisten, como podería facelo un pequeno medio de comunicación creado por un grupo de xornalistas interesados na ciencia? O simple feito de que GCiencia celebre o seu quinto aniversario vén demostrar unha vez máis o estorbo do pesimismo.

Publicidade

Cinco anos despois daquel emocionante 25 de novembro de 2013, o prodixio non é só que GCiencia siga existindo, senón que se teña convertido nunha referencia da divulgación científica, non exclusivamente en Galicia. É, máis ben, que se teña convertido nun medio punteiro no ecosistema da comunicación da nosa terra. Miles de persoas entran cada día nos seus contidos para saber que pasa no mundo do coñecemento: avances, novidades, proxectos e tamén fracasos. Narrados con todo o rigor que esixe o científico, pero con toda a simplicidade que require o xornalismo.

Con esa fórmula, pero convertido nunha plataforma moito máis ampla que a de mera distribuidora de contidos, GCiencia é un fenómeno dixital que chega a superar os dous millóns de visitas e os 360.000 usuarios únicos mensuais, e que o pasado outubro traspasou a barreira dos 50.000 seguidores en Facebook. Porque en redes sociais,  GCiencia é o primeiro nativo dixital de Galicia e o líder dos medios escritos en galego, ademais do cuarto medio de comunicación galego, só distanciado de La Voz de Galicia e Faro de Vigo.

Desde o primeiro momento, GCiencia puxo todo o seu empeño en exercer xornalismo de calidade, e fíxoo por convencemento e por entendelo como a fórmula máis adecuada para achegar ao público xeral un universo complexo como o científico. Todos os xornalistas que traballan ou traballaron para GCiencia son profesionais da información cunha traxectoria contrastada. A calidade dos textos foi sempre o seu principal reto, como o demostra que os seus contidos fosen incorporados a libros de texto ou incluídos nos exames de Reválida para 22.000 alumnos de Sexto de Primaria.

O auxe da divulgación ten moito que ver coa boa saúde deste proxecto iniciado hai cinco anos, un fenómeno que xa se albiscaba en 2013, pero que hoxe é unha realidade incontestable que, esperemos, contribuirá a redobrar a aposta das institucións públicas pola investigación científica. GCiencia contribúe á divulgación non só desde os seus contidos, senón tamén desenvolvendo unha intensa actividade con diversidade de formatos: desde premios de comunicación científica ou ás mellores empresas do ámbito universitario ata talleres científicos para escolares, pasando pola organización da Semana da Ciencia ou a edición da revista da Real Academia Galega de Ciencias.

Todo isto permitiu que GCiencia fose distinguido con premios como o de Comunicación Dixital no Sector Xornalístico, concedido en 2015 polo Foro da Comunicación de Galicia; o de Xornalismo Científico 2017 da Academia de Ciencias –outorgado a un traballo sobre a Ataxia da Costa da Morte– ou o propio iProx do Colexio de Xornalistas, que permitiu poñer en marcha o proxecto, ademais de resultar finalista dos Premios da Crítica 2018 ou do Público de Culturgal 2017.

Cumpridos cinco anos desde a súa estrea, GCiencia encara o futuro rebordante de optimismo e cheo de novos proxectos editoriais e divulgativos, que aborda desde o redeseño que hoxe estrea e sempre coa idea de apostar pola ciencia e o xornalismo. A ambición é moito maior, a de consolidar por moitos anos máis un proxecto xornalístico cada vez máis robusto, pero a receita non varía. Esa combinación de xornalismo e divulgación que agora figura como lema da nosa cabeceira é a nosa proposta para conseguilo.

Tamén podes ler: GCiencia renóvase polo seu quinto aniversario.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

A UVigo reivindica no Día Mundial da Auga a importancia do seu acceso universal

A universidade impulsa a concienciación través dunha serie de pódcast con nenos e nenas e dun concurso escolar de microrrelatos

Convocado o IX Premio de Xornalismo Científico Celia Brañas

Os traballos poden enviarse a partir do 15 de abril. A dotación económica do galardón será de 5.000 euros, cun accésit para o segundo mellor valorado
00:03:09

As patacas teñen lingua propia: o vídeo dunha galega finalista nun certame de divulgación

A investigadora da Misión Biolóxica de Galicia Lucía Martín Cacheda presenta unha peza audiovidual sobre a comunicación química das plantas

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC