Explicación: por que esta galaxia está a xirar tan rápido? Para comezar, incluso é difícil identificar que tipo de galaxia é UGC 12591; ten corredores de po escuro coma unha galaxia espiral pero un bulbo de estrelas grande e difuso coma unha lenticular. De xeito abraiante, as observacións amosan que UGC 12591 xira a uns 480 km/s, case dúas veces máis rápido que a nosa Vía Láctea, sendo a velocidade de rotación máis rápida medida. A masa necesaria para manter unida unha galaxia en rotación tan rápida é varias veces a masa da nosa galaxia Vía Láctea. Os escenarios da orixe de UGC 12591 inclúen un crecemento lento mediante a acreción da materia ambiente ou un crecemento rápido pola recente colisión ou colisións galácticas; xa o dirán as vindeiras observacións. A luz de UGC 12591 que vemos hoxe abandouna hai uns 400 millóns de anos, cando as árbores se desenvolveron por primeira vez sobre a Terra.