Únete á nosa canle de Whatsapp
Oír, ver e tocar. Especialmente tocar. Unha realidade da que nos afastou a crise sanitaria, mais que agora imos recuperando sen présa pero sen pausa. Así é que o Concello da Coruña volve reactivar dous dos seus museos científicos: a Casa das Ciencias e o Domus, que se suman á actividade xa en marcha no Aquarium Finisterrae. Dous espazos concibidos para experimentar; para entender o mundo científico dende unha perspectiva máis próxima e rechamante. E por iso que, a través dunha reserva previa, as súas salas interactivas abren de novo as portas.
A través delas pódese descubrir todo un universo. O mesmo que a Casa das Ciencias expón no seu planetario, que ofrece a posibilidade de aprender a interpretar o firmamento e de achegarse, máis cerca ca nunca, a un ceo tinguido de estrelas. Mais este museo coruñés, que abriu no 1985, ten outras salas nas que se poden descubrir outros tantos tesouros.
Un mundo de aprendizaxe
Unha delas é a exposición Ceos Galegos: toda unha colección fotográfica que recompila imaxes, tanto de día como de noite, do ceo. Todas elas vistas dende diferentes enclaves galegos. A astronomía é un dos platos fortes da Casa das Ciencias, posto que outra das salas do museo coruñés está centrada en explicar como os medios de comunicación transmiten as noticias relacionadas co espazo exterior.
As outras dúas exposicións que brinda este recinto son Puro Swing e Parque. A primeira delas é unha sala que axuda a entender que son os péndulos e como funcionan. A través dela comprenderase como é posible o movemento do botafumeiro. A segunda pon o seu foco no parque de Santa Margarita, que se atopa xusto no exterior do edificio, onde se poden descubrir outras moitas curiosidades. Todas elas cun mesmo fío condutor: a ciencia.
Descubrir o ser humano
O outro recinto que abre as súas portas é a Domus, o primeiro museo interactivo do mundo dedicado ao ser humano. Nel pódense atopar exposicións con temáticas como a nutrición, a anatomía, a xenética ou a evolución humana. E non só iso, senón que tamén ofrece outros espazos para gozar do cinema ou mesmo para aprender a facer tecnoloxía por un mesmo.
Dous museos que recuperan a súa actividade, pero que non esquecen que a pandemia segue aí. É por iso que se precisa facer reserva previa, usar a máscara e manter a distancia de seguridade. Mais o coñecemento e a curiosidade non teñen que estar enfrontados co coronavirus. Por iso a Casa das Ciencias e a Domus lánzanse, de novo, a recibir a todo ese público atento e con ganas de seguir aprendendo.
Podes facer a túa reserva na páxina web dos Museos Científicos Coruñeses, nesta ligazón.
