A Consellería de Sanidade informou neste serán, ao concluír a reunión do comité clínico que asesora á Xunta de Galicia no seguimento da pandemia da Covid-19, que os concellos de Ordes, Melide e Monforte de Lemos, estarán a partir da medianoite do venres ao sábado no nivel máximo de restricións, que conleva o peche do interior dos locais de hostalaría e limitacións de capacidade nos exteriores. Deste xeito, Melide, con 114 positivos detectados nas últimas dúas semanas e 73 a sete días, súmase aos dous concellos que xa están desde a pasada semana no limiar de maior alerta, ao sumar máis de 200 casos, cunha incidencia acumulada por riba de 500/100.000 habitantes, nas últimas dúas semanas.
Do mesmo xeito, o comité clínico acordou que rexerá o nivel alto de restricións para os concellos de Agolada, Arzúa, Lalín, O Pino, Trazo, Curtis, Cee, Cerceda, Muxía, Antas de Ulla, Monterroso, Palas de Rei, Vilalba, A Pastoriza, Castro de Rei, Meira, O Saviñao, A Pobra de Trives, Viana do Bolo, Ares e A Cañiza.
As medidas do nivel medio estableceranse nos municipios da Coruña, Arteixo, Cabana de Bergantiños, Carballo, Corcubión, Malpica de Bergantiños, Oleiros, Oza-Cesuras, Ponteceso, Zas, Aranga, Betanzos, Camariñas, Fisterra, Santa Comba, Silleda, Boimorto, Frades, Muros, Noia, Santiso, Tordoia, Ferrol, Chantada, Lugo, Outeiro de Rei, Baralla, Cospeito, Taboada, A Rúa, Ourense, O Barco de Valdeorras, Verín, Bueu, Poio, Sanxenxo, Gondomar, Pazos de Borbén, Ponteareas, Redondela e Nigrán. Deste xeito, as cidades de Vigo, Santiago e Pontevedra pasan ao nivel medio-baixo, xunto ao resto de concellos galegos.
Segundo os datos achegados este martes polo Ministerio de Sanidad, a IA a 14 días en Galicia é de 259,04 casos/100.000 habitantes a 14 días, e baixa a 105,98 na última semana. Os casos concéntranse sobre todo no grupo de poboación de 12 a 29 anos, cunha IA por riba de 600. Desde o comezo da pandemia faleceron en Galicia 2.566 persoas por mor da Covid-19. Segundo detallou o Sergas, con datos pechados na tarde do luns, hai 169 persoas ingresadas polo coronavirus e outras 55 estás nas UCIs dos hospitais galegos.