Únete á nosa canle de Whatsapp
Primeiro foi a Marcha das Mulleres. Agora son os científicos os que se organizan para manifestarse contra as decisións de Donald Trump a través da iniciativa March For Science. A marcha, que aínda non ten data concreta, celebrarase en Washington e pretende reunir a científicos de todas as ideoloxías. Tamén haberá varias marchas satélites no resto de estados e noutros países para aqueles que non poidan asistir á de Washington.
En pouco máis dunha semana de mandato, o novo inquilino da Casa Branca puxo na súa contra á comunidade científica estadounidense. Os recortes anunciados pola nova administración e a postura de Trump ante o cambio climático son só algúns dos motivos para a mobilización.
Os responsables da March for Science non pretenden que sexa unha acción partidista, aínda que os seus organizadores aseguran que o obxectivo é que as súas protestas teñan impacto nos responsables políticos. “Isto debe preocupar a calquera que valore a investigación empírica e a ciencia”, aseguran na súa web.
Varios grupos en defensa do medio ambiente tamén se manifestarán en abril
Ademais, varios grupos en defensa do medio ambiente convocaron as súas propias manifestacións para o mes de abril en protesta polos plans da administración Trump de abandonar as políticas ambientais iniciadas por Obama e permitir a construción de oleodutos en lugares protexidos, como é o caso de Standing Rock, en Dakota.
O recente veto do Goberno aos inmigrantes tamén foi obxecto de crítica polos científicos. Na súa web apunta a que a marcha ten que contar con apoios de xente de todos os países, estratos e colectivos, porque “un grupo diverso de científicos produce unha investigación máis diversa, o que amplía as fortalezas e enriquece a investigación científica, ademais do noso coñecemento do mundo”.
Por iso comprométense a centralizar e a expresar a súa solidariedade con todos os membros da comunidade científica sexa cal for a súa raza, a súa relixión ou a súa preferencia sexual. “Debemos traballar en facer que a ciencia estea dispoñible para calquera e alentar a que a xente poida seguir coas súas carreiras científicas”, aseguran os responsables da marcha.
Varios organismos recibiron orde de limitar a súa información na web
Varios organismos estatais recibiron a orde de limitar a súa comunicación vía web cos usuarios, como a NASA, a Axencia de Protección Ambiental e os Parques Nacionais.
Un exemplo disto foi a conta de Twitter do Badlands National Park, que a semana pasada comezou a publicar mensaxes achegando datos sobre os problemas causados polo cambio climático. Precisamente, durante a campaña Trump declarouse en varias ocasións en contra da existencia do cambio climático, cualificándoo mesmo dun “invento dos chineses“.
O Servizo Nacional dos Parques Nacionais apurou a borrar eses tweets alegando que foran publicados por un antigo empregado que aínda tiña acceso ás contas. Aseguraron ademais que, desde esa rede social, só se daría información sobre os parques e a seguridade do público a condición de que non estivesen relacionadas coa política nacional.
Estas decisións xeraron a aparición de contas alternativas en redes sociais de organismos estatais que defenden que os cidadáns teñen dereito á información, tomando prestados os logotipos dos organismos reais. O que non se puido comprobar é se as contas están a ser manexadas por empregados públicos destas axencias ofrecendo información alternativa á que lles está permitido polas canles oficiais.
