A investigación Lixo mariño desenvolvida por Alejandra Jáudenes Rodríguez, man a man coa súa nai Emma, afianza o seu interese pola ciencia e a súa concienciación ambiental. Con só 9 anos presenta por segunda vez un proxecto na sección Ciencia en Familia da Feira da Miniciencia-Pontenciencia 2022, que estará aberta ao público os días 27 e 28 de maio na Escola de Enxeñería Forestal de Pontevedra.
Tras documentarse sobre o lixo mariño —segundo a UNEP, “calquera sólido persistente de orixe non natural (manufacturado) que fose refugado, depositado ou abandonado en ambientes mariños e/ou costeiros”— , a familia Jáudenes Rodríguez formulou non unha, senón dúas hipóteses: o 80% do lixo mariño é plástico e o 50% deste plástico ten a súa orixe na pesca.
Así que ao choio. Recolleron o lixo atopado en seis areais da ría de Pontevedra e clasificárono para obter datos cuantitativos dos obxectos e materiais localizados (botellas de plásticos, bricks, vidro, téxtiles, papel, redes, pelotas, un bidón…) En concreto, peitearon as praias de Lapamán e Banda do Río (Concello de Bueu), Aguete (Marín), Lourido e Cabeceira (Poio) e A Lanzada (Sanxenxo-O Grove).
Peitearon seis praias: Lapamán, Banda do Río, Aguete, Lourido, Cabeceira e A Lanzada
Mais conscientes de que a contaminación mariña é un problema global, Alejandra e Emma pediron a amigos da familia que viven noutros países que acudisen a praias da súa contorna e recollesen o lixo tirado alí e que lles informasen do atopado para cotexalo coa realidade local á hora de verificar (ou non) a primeira das súas hipóteses: o 80% do lixo mariño é plástico. Obtiveron datos chegados desde Reino Unido, Panamá, Alemaña, Australia, Indonesia e Vietnam.
Problemática xeral
Esta recompilación de datos permitiulles acreditar que o lixo mariño é unha problemática que afecta a todo o mundo e que o que ocorre nos areais pontevedreses é semellante ao que sucede noutros países. “A primeira hipótese era certa: nós tiñamos o 82% de plásticos e eles o 81%, case o mesmo”, explica Alejandra.
A que non puideron validar foi a segunda hipótese exposta, centrada no ámbito local, que aludía a que o 50% dos plásticos tiña a súa orixe na actividade pesqueira. O volume deste tipo de lixo quedou moi afastado da porcentaxe de referencia.
Alejandra está lista para expoñer diante do xurado e explicar ao público interesado a investigación Lixo Mariño. O seu é un dos catro traballos presentados a Pontenciencia, na sección Ciencia en Familia. Será na mañá do sábado 28 de maio, segunda xornada de Feira da Miniciencia.
Emma Rodríguez non dubida en cualificar de “moi interesante e positivas” iniciativas como Pontenciencia que anima a nenas e nenos, no colexio ou coa familia, a traballar seguindo o método científico, “aprenden a facer unha investigación coma se fose un xogo”.
Pontenciencia 2022: Que o coñecemento non pare! está organizada polo Concello de Pontevedra en colaboración dá Fundación Española para a Ciencia e a Tecnoloxía-Fecyt, ademais da Deputación de Pontevedra, a Universidade de Vigo e a FANPA Pontevedra.