Xoves 28 Marzo 2024

Unha investigación para aforrar enerxía nas depuradoras de augas

A medida e mellora da eficiencia enerxética das estacións de depuración de augas residuais urbanas (EDAR) é o tema de estudo da tese de doutoramento de Stefano Longo titulada ‘Assessment of energy efficiency in wastewater treatment plants. Turning data into useful information’. Baixo a dirección da profesora Almudena Hospido Quintana e do investigador Miguel Mauricio Iglesias do grupo de Biotecnoloxía Ambiental (Biogroup) do Departamento de Enxeñaría Química, a investigación abordou a necesidade de definir, medir, analizar e comparar indicadores apropiados de uso de enerxía nas EDAR para mellorar a súa eficiencia enerxética. Longo apunta que o consumo eléctrico dos sistemas de tratamento de auga residual representa un 1% do consumo mundial, sendo un dos sectores máis intensivos en enerxía dentro das industrias públicas.

Grazas aos avances nas tecnoloxías de información e á proliferación de sistemas de control e adquisición de datos e sensores existe unha gran cantidade de datos sobre a xestión das augas residuais urbanas que son “moi pouco utilizados e constitúen un recurso precioso para mellorar o rendemento dos procesos”. Neste senso, Stefano Longo explica que “unha idea central neste traballo é que é posible usar métodos de benchmarking para extraer información e coñecemento destes datos”. Dado que as EDAR son sistemas únicos, a investigación levouse a cabo conxuntamente con empresas de saneamento, “ estratéxicas para establecer como aplicar os métodos de análise de datos e asegurar que os resultados sexan de fácil interpretación”.

Publicidade

Logo de ENERWATER.

Na tese aplicáronse ferramentas como a Análise Envolvente de Datos (DEA polas súas siglas en inglés), Análise Estocástica de Fronteiras (SFA) e Análise de Ciclo de Vida (LCA). As técnicas descritas, “usadas e melloradas nesta tese serán esenciais para mellorar as operacións das EDAR”. En particular, Longo considera que o traballo realizado permitirá ofrecer orientación sobre como definir a eficiencia enerxética das EDAR e a diagnose das causas nos casos de rendemento enerxético baixo. O investigador agarda que os resultados da investigación dean lugar a “aforros importantes” de enerxía no tratamento de augas residuais”.

ENERWATER
A tese desenvolveuse no marco do proxecto ENERWATER, unha plataforma de colaboración financiada polo programa Horizon 2020 e coordinada pola USC, co obxectivo principal de desenvolver un estándar para medir o consumo das EDAR, cuantificar a súa eficiencia enerxética e favorecer a transferencia de coñecemento mediante unha etiqueta enerxética facilmente recoñecible.

Co gallo de acadar o máximo impacto, ENERWATER colaborou co Comité Europeo de Normalización (Comité Técnico CEN 165), no proceso de transformar o método homónimo nunha norma estándar europea para a avaliación e comunicación da eficiencia enerxética das estacións de depuración de augas residuais. Por todas estas actividades, ENERWATER foi premiado polo Colexio Oficial de Enxeñeiros Industriais de Galicia como o mellor proxecto de eficiencia enerxética nos Premios Galicia Enerxía 2018.

A investigación doutoral viuse reflectida en varias publicacións nas revistas científicas internacionais máis destacadas no ámbito da enerxía (Applied Energy, Energy Journal) e da auga (Water Research), así como na participación en máis de dez conferencias de ámbito internacional. Dentro das actividades da súa tese, Stefano Longo tamén levou a cabo colaboracións importantes con outros centros de investigación internacionais como o Surrey Energy Economic Center (SEEC) na Universidade de Surrey (Reino Unido).

O tribunal que avaliou o traballo estaba formado por María Luz Loureiro García, catedrática de Fundamentos de Análise Económica da USC; Silvia Fiore, profesora de Enxeñaría de Saneamento e Ambiental da Universidade de Turín, e Lluis Corominas Tabares, investigador do Instituto Catalán de Investigación da Auga.

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Galicia avanza para contar cos seus propios medicamentos CAR-T nos próximos anos

A finais de ano abrirá un centro de produción en Santiago e un proxecto de investigación traballa para aplicalos en tumores sólidos

Así era Castro Valente: a fotografía láser recrea a muralla da gran fortaleza medieval galega

Un estudo da USC usa as novas tecnoloxías para ampliar información sobre o xacemento de 10 hectáreas situado entre Padrón e A Estrada

O meteorito que brillou como cincuenta lúas cheas xa pode visitarse en Santiago

Tratouse dun asteroide de 1,15 metros de tamaño e 2,62 toneladas de masa que chocou contra a atmosfera a 15 Km/s

Unha tese galega demostra a viabilidade de reutilizar restos vinícolas e pesqueiros no país

Antonio Cortés avaliou a sustentabilidade das estratexias de valorización de residuos orgánicos, alén de estudar a ecoeficiencia dos procesos