Explicación: moitas galaxias espirais teñen barras que as atravesan polo seu centro. Cóidase incluso que a nosa propia galaxia Vía Láctea ten unha modesta barra central. A galaxia espiral NGC 1672, moi barrada e que se amosa aquí, captouse espectacularmente polo miúdo nunha imaxe tirada polo Telescopio Espacial Hubble en órbita. Poden ollarse os filamentarios corredores escuros de po, is cúmulos mozos de estrelas azuis e brillantes, as nebulosas de emisión vermella de gas hidróxeno brillante, unha barra longa e brillante de estrelas atravesando o centro e un activo núcleo brillante que posiblemente alberga un burato negro supermasivo. Á luz lévalle uns 60 millóns de anos chegar a nós desde NGC 1672, que abarca uns 75.000 anos luz de diámetro. NGC 1672, que aparece na constelación de Dorado, está a ser estudada para averiguar como unha barra espiral contribúe á formación de estrelas nas rexións centrais dunha galaxia.