Únete á nosa canle de Whatsapp
O portal Mancomún, a web de referencia do software libre en Galicia, cumpre este 10 de maio un decenio de vida. O portal da Axencia de Modernización Tecnolóxica de Galicia (Amtega) alberga as numerosas iniciativas que se promoven para dar a coñecer os recursos informáticos de libre acceso.
Nestes dez anos, Mancomún serviu de canle de comunicación pública na que se informou de todo tipo de proxectos, non só da Administración Autonómica, senón tamén do resto de axentes promotores do software libre en Galicia. Ao mesmo tempo, o portal proporcionou unha ampla gama de servizos dirixidos a promover a difusión, formación, e desenvolvemento do software libre en Galicia. A web alberga o Repositorio de Software Libre de Galicia, no que hai rexistrados un total de 310 proxectos, dos cales 18 son proxectos liberados pola Xunta de Galicia.
A web ten rexistradas 310 iniciativas de software libre desenvoltas en Galicia
Desde 2006 o portal publicou arredor de 4.650 novas relacionadas co software libre, de interese para o sector público, o sector empresarial e a cidadanía. A maiores, publicáronse 40 entrevistas a empresas, persoas ou axentes de relevancia no sector dos sistemas de libre acceso. Nos últimos anos incorporáronse novas seccións, nas que se publicaron artigos tecnolóxicos e 22 números do boletín mensual de reutilización de software libre nas administracións públicas. Durante 2015, o portal tivo unha media de 21.700 visitas mensuais cuns 3.900 visitantes distintos ao mes.
Coincidindo con este décimo aniversario, no último trimestre do ano está previsto publicar unha nova versión do portal, que incluirá o dominio “.gal” e renovará contidos e estruturas e adecuarase ao seu uso nos dispositivos móbiles.
