Parte do equipo premiado, formado por dez enxeñeiros da Universidade de Vigo

Parte do equipo premiado, formado por dez enxeñeiros da Universidade de Vigo

A aplicación que envía aos bombeiros a foto do lugar exacto do lume

Dez enxeñeiros da Universidade de Vigo reciben un premio da Axencia Espacial Europea para desenvolver unha app que localiza accidentes

Unha aplicación para móbiles que permite enviar aos servizos de emerxencia unha foto coa localización exacta dun accidente ou calquera outro desastre remoto coma un fogo. Esta foi a idea coa que un equipo de dez enxeñeiros da Agrupación Estratéxica Aeroespacial da Universidade de Vigo, capitaneados por Alberto González Muíño, gañou o primeiro premio rexional do concurso europeo de navegación por satélite (ESNC 2015), un galardón, convocado pola Axencia Espacial Europea coa Zona Franca de Vigo como principal socio rexional e a colaboración da propia Universidade, o Igape e a Axencia Galega de Innovación. Este martes recolleron o premio en Berlín nunha cerimonia celebrada na sede do Ministerio de Transportes e Tecnoloxías Dixitais do goberno federal.

Os gañadores do premio recolleron o seu galardón en Berlín este martes

Os gañadores do premio recolleron o seu galardón en Berlín este martes

Acompañado polo profesor do Departamento de Teoría do Sinal e Comunicacións da EE de Telecomunicación, Francisco J. Díaz-Otero, punto de contacto en Galicia da organización do concurso e por Rosa Eguizábal, directora de Promoción Económica do Consorcio Zona Franca, o investigador vigués foi o encargado de recoller o premio a unha idea que bautizaron como Point and Pin e que asinan, xunto a el, os investigadores Antón Vázquez, Bibiano Fernández-Arruti, Aaron Nercellas, Diego Hurtado, Franco Pérez, Diego Nodar e o profesor Fernando Aguado, director da Agrupación Estratéxica Aeroespacial.

“Para nós é unha inmensa alegría ter acadado este premio”, subliñou Fernández-Arruti, quen recoñeceu que para o equipo “foi xa todo un orgullo ter participado nunha iniciativa que desde o primeiro intre nos pareceu moi interesante”.

A idea do negocio consiste nunha aplicación para teléfonos intelixentes que, mediante o receptor GPS e sistemas de aumentación coma EGNOS, emprega a cámara de fotos e os sensores do móbil para obter unha localización exacta dun punto remoto, o que resultará de gran utilidade, entre outras cuestións, para informar aos servizos de emerxencia da posición exacta dun suceso.

“Dende o primeiro momento quixemos presentar algo que tivese unha aplicación moi directa en Galicia, fixemos unha especie de brainstorming entre todos e esta idea foi a que nos pareceu máis interesante”, recalcou o investigador vigués, que fixo fincapé na “utilidade” dunha app que, a diferenza doutras existentes na actualidade, “emprega os modelos dixitais do terreo para precisar mellor a posición remota”.

Tras recoller o premio o equipo gañador ten agora á súa disposición un programa de incubación de doce meses nun dos centros de iniciativas empresariais da Zona Franca de Vigo, onde recibirá a asistencia necesaria para pór en marcha a súa propia idea de negocio e onde poderán desenvolver a súa empresa co acceso a capital semente, capacitación a través dunha rede de mentores, apoio de infraestrutura e consultaría intensiva.

Os investigadores recibirán agora asesoramento para poñer en marcha a súa idea de negocio

“Para nós vai ser unha axuda moi importante, xa que un dos grandes problemas de montar unha startup aquí en España é o feito de poder contar cun local propio no que poder reunirse”, explica Fernandez-Arruti, que dá tamén especial importancia ao tema do asesoramento, “pois nós dominamos a parte técnica, pero non todo o que se refire á administración dunha empresa, polo que ter axuda neste sentido é un incentivo para seguir adiante”.

Esta foi a primeira vez que se convocou en Galicia o ESNC Galician Community Challengue, un concurso internacional de innovación que premia as mellores ideas para o desenvolvemento de aplicación de navegación por satélite e que se dirixe a empresas, emprendedores, investigadores, estudantes ou inventores para apoiar as oportunidades de negocio que se abren coa navegación por satélite e o sistema Galileo.

“A Universidade involucrouse dende o primeiro momento na difusión e soporte a este concurso, apoiando ao socio principal, o Consorcio da Zona Franca, e aos socios secundarios, o Igape e Gain; e directamente tamén a través do Campus do Mar e AtlantTIC, que deron soporte e nos axudaron na difusión”, explicou o profesor Francisco J. Díaz-Otero, que subliñou que, finalmente, nesta convocatoria se presentaron 17 ideas asociadas a sectores TIC, polo que xa se conseguiu un bo reto, “que Galicia se situase no undécimo posto das rexións europeas concursantes”. Nesta liña, desde a organización rexional, informouse tamén que os segundos e terceiros premios galegos se outorgaron a unha aplicación para o navegador do coche que avisa do estado da estrada a un quilómetro vista e a outra app que posiciona ao bombeiro en canto activa o seu equipo de comunicacións.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.