As universidades galegas, nas 300 mellores do mundo polo compromiso medioambiental

A universidade de Indonesia vén de publicar o seu ránking anual Greenmetric, que cualifica as institucións de educación superior de todo o mundo polo desenvolvemento e implantación de políticas e programas respectuosos co medio ambiente e a sustentabilidade. E das 719 que entran na lista, as tres galegas aparecen nos 300 primeiros postos.

A mellor clasificada das universidades galegas é a da Coruña, que sobe ata o 93º lugar, cunha valoración global de 6.800 puntos. No conxunto de España é a sétima, e destaca sobre todo pola xestión de residuos, no que é a quinta clasificada.

Publicidade

A clasificación reúne, alén do tratamento do lixo, que representa un un 18% da valoración final, outros criterios como os de enerxía e cambio climático (21%); programas de educación e investigación (18%); accións en relación cos medios de transporte nos campus (18%); configuración e infraestruturas (15%); e uso da auga (10%).

A seguinte clasificada é a Universidade de Vigo, 117º a nivel mundial e 11º estatal, con 6350 puntos. A terceira, a Universidade de Santiago de Compostela, está no posto 268º, con 5175 puntos, e no lugar 21º no eido estatal.