Xoves 28 Marzo 2024

A eurodeputada Lidia Senra cuestiona a seguridade das vacinas

As vacinas “teñen efectos colaterais, contraindicacións e moitos efectos secundarios e adversos que poden aparecer despois da vacinación, chegando nalgúns casos a provocar a morte”. Así comeza a pregunta escrita que a eurodeputada Lidia Senra, representante de Anova no Parlamento Europeo, formulou á Comisión Europea.

“Hai un negocio moi grande detrás dos medicamentos e as vacinas”, di Senra

Esta semana, asociacións de científicos e contra as pseudociencias criticaron a actitude de Senra a través das redes sociais e a polémica fíxose notoria. O presidente do Círculo Escéptico, o biólogo galego Vicente Prieto, manifestou a súa indignación en conversa con GCiencia: “Parécenos moi irresponsable que unha eurodeputada faga afirmacións así. As vacinas son dos medicamentos que máis probas pasan para demostrar a súa efectividade e seguridade”.

Publicidade

Prieto lembrou tamén os problemas que están xurdindo nalgúns países de Europa, como Portugal, Romanía, Inglaterra ou Italia, debido ao movemento antivacinas. “Enfermidades que xa estaban case erradicadas están volvendo a causar problemas graves, como o sarampelo”, con focos graves en cidades como Leeds ou Liverpool nas últimas semanas.  Así, as autoridades inglesas pediron á xente que quedara en casa en caso de ter síntomas. “Estamos vendo que todos os casos son en nenos e adultos novos que non recibiron a tripla vírica”, dicía unha experta do Servizo Nacional de Saúde inglés.

“Parécenos moi irresponsable”, di Vicente Prieto, presidente do Círculo Escéptico

Lidia Senra tamén respondeu ás cuestións de GCiencia, e explicou os motivos que a levaron a presentar esta pregunta: “O tema vai moito máis alá. Hai xente que se cre Deus e que pode xogar coas persoas, ou que pensan que o único válido e certo é o que eles din”, criticou Senra, en alusión ás empresas farmacéuticas. “Hai un negocio moi grande detrás dos medicamentos e as vacinas, que controlan os que pagan as investigacións. Cando a investigación está na súa inmensa maioría en mans privadas, en laboratorios que se lucran co que producen, non se pode dar por seguro todo o que sosteñen”.

“Liberdade para decidir sobre a propia saúde”

Sobre os posibles efectos secundarios das vacinas, Lidia Senra alude aos casos de supostas afectadas pola vacina do virus do papiloma humano e, sobre todo, á falta de información sobre os supostos danos colaterais da inmunización, de aí que se solicite o consentimento informado. “Todo o mundo debe ter dereito a ser informado, a liberdade para decidir sobre a propia saúde. Eu non son ninguén para dicirlle a ninguén o que ten que facer, pero hai que poñer as cartas sobre a mesa”.

A respecto das críticas recibidas, Senra sinala que “igual os que se molestan pensan que o seu negocio pode sufrir se isto sae adiante”. A respecto do aumento dos casos de sarampelo, lembrou: “eu tamén pasei de pequena o sarampelo, como tanta outra xente”.

O comisario de Saúde e Seguridade Alimentaria respondeu a Senra en outubro

O comisario europeo de Saúde e Seguridade Alimentaria , o lituano Vitenis Andrukaitis, respondeu á pregunta de Senra en outubro. Sinalaba na súa contestación que “as vacinas autorízanse unicamente despois de que a súa calidade, seguridade e eficacia fosen avaliadas e se conclúa que hai un balance positivo entre os riscos e os beneficios relacionados co seu uso”.

Engadía o comisario que “tras a autorización, todos os medicamentos, vacinas incluídas, son sometidos a unha vixilancia despois da súa comercialización por parte do titular da autorización de comercialización e as autoridades competentes. Dita vixilancia “inclúe a análise de calquera información nova en materia de seguridade”, e “os indicios de riscos notifícanse a escala da UE e son avaliados pola Axencia Europea de Medicamentos; en caso necesario, adóptanse medidas regulamentarias”. Esta foi a súa resposta íntegra.

Resposta do comisario europeo de Saúde e Seguridade Alimentaria a Lidia Senra. Fonte: Parlamento Europeo.
Resposta do comisario europeo de Saúde e Seguridade Alimentaria a Lidia Senra. Fonte: Parlamento Europeo.

A pregunta foi realizada no verán, pero nos últimos días comezou a circular polas redes sociais, despois dun chío do Partido Popular de Galicia no que criticaba a Senra. E foi durante este xoves e venres cando a polémica cobrou forza a través de Twitter.

Durante esta lexislatura, Senra xa fora criticada pola súa postura respecto a outros temas polémicos como os transxénicos ou o virus zika.

 

 

3 COMENTÁRIOS

  1. Paréceme moi preocupante que vos fagades eco de magufadas diversas. Eu teño recomendado este medio en numerosas ocasións e despois de ler isto… En fin…

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

África González, ante a reaparición do sarampelo: “As familias deben vacinar os seus fillos”

España rexistra os seus primeiros casos trala pandemia e dende o 1 de xaneiro suma xa 15 contaxios

O sarampelo rexorde con forza en Europa: que podemos facer?

https://theconversation.com/javascripts/lib/content_tracker_hook.js *Un artigo de As autoridades sanitarias portuguesas confirmaron un novo caso de...

Por que teñen tanto éxito os discursos anticientíficos?

O 'terraplanismo', os 'movementos antivacinas' e o 'negacionismo climático' son conceptos que se popularizaron nos últimos anos

O Sergas desenvolve un sistema de formación para profesionais que funciona como Netflix

A Plataforma Share xa está a funcionar en modo piloto, aspira a ordenar e clasificar o coñecemento sanitario e recomendar cursos á carta