Únete á nosa canle de Whatsapp
Un estudo do ano 2016 (Kenneth J. Locey e Jay T. Lennon: “Scaling laws predict global microbial diversity”) sinalaba que máis dun billón de especies microbianas teñen o seu fogar no noso planeta. “E onde están todos eses microbios?”, pregúntase a familia pontevedresa Pérez Estévez. E foron buscar a resposta na súa propia casa, nunha investigación coa que participan no certame Pontenciencia, que organiza o Concello de Pontevedra coa colaboración da FECYT.
No resumo do seu proxecto, os Pérez Estévez fan todo un tratado sobre as bacterias “están por todas partes, enriba nosa, debaixo, arredor e incluso dentro nosa. As bacterias son microorganismos unicelulares que presentan un tamaño de algúns micrómetros de largo. Un ambiente húmedo e unha temperatura templada son factores que permiten a unha bacteria desenvolverse. Unha bacteria pode reproducirse un billón de veces en 24 horas. As investigacións existentes revelan que a metade das veces que os nenos/as acuden a urxencias son por accidentes e axentes virais, e a outra metade son enfermidades causadas por bacterias presentes no fogar”.
A partir de aquí, decidiron sair na procura das bacterias do seu fogar.
-En que consiste o proxecto?
-O noso proxecto foi o cultivo -en placas Petri con agar- de bacterias procedentes de distintos medios da nosa casa, ver como crecían e se todas eran iguais. Para iso, eliximos distintos lugares a mostrear: dedo, boca, nariz e unllas (mostras corporais) e retrete, mando, teclado, ventá e pomo da porta (ambiente caseiro) e as colocamos nas placas Petri con agar. Ao longo dun mes fumos observando os seus cambios. Por último as observamos no microscopio.
-Que os motivou a participar?
-A posibilidade de participar nunha actividade na que está involucrada toda a familia, na que nos divertimos xuntos á vez que descubrimos cousas novas. Ademais ofrecer á posibilidade a nenos/as de tan pequenas idades de poder falar en público, aprender a expresarse e perder o medo escénico, son oportunidades que non se deben deixar pasar.
-Quen é o máis cientifico/a da familia?
-O máis científico da casa é, sen dúbida ningunha, Emilio Pérez Estévez, o máis pequeno da familia, que ten un ansia de aprender enorme e moita curiosidade por todo o que lle rodea.
-Que valores educativos achega Pontenciencia aos cidadáns en xeral e as familias en particular?
-Os obxectivos que persigue son achegar a actividade investigadora e a ciencia á sociedade, o que contribúe a crear unha relación máis directa entre os investigadores e o público en xeral. Así mesmo, axuda a despertar a curiosidade e o interese científico das familias e da cidadanía en xeral, ao mesmo tempo que axuda a visibilizar a ciencia e a actividade científica en campos moi diversos.
-Está a medrar o interese pola ciencia na nosa sociedade?
-O interese pola ciencia está a crecer, e son moi importantes este tipo de iniciativas para vincular a comunidade científica e a comunidade educativa e o entorno social, favorecendo a integración do pensamento investigador que pode ser interiorizado e transferido a diversos campos.
