Únete á nosa canle de Whatsapp
O autónomo en particular e o emprendedor en xeral é alguén que ten que enfrontarse, moitas veces en solitario, a unha serie de tarefas que poden acabar por converterse nun verdadeiro obstáculo á hora de poñer en marcha ou desenvolver o seu negocio. O uso das TIC e das novas tecnoloxías pode axudarlle moito a conseguir os seus obxectivos e, case sempre, isto pode conseguirse cun baixo nivel de investimento.
O servizo SmartPeme, posto en marcha pola Deputación de Pontevedra en 2016, converteuse en pouco tempo nun eficaz acompañante para o emprendedor ao que orienta nun terreo que moitas veces resúltalle completamente descoñecido. Axudarlle a saber como enfrontarse aos retos e oportunidades que representan as novas tecnoloxías no mundo empresarial é o principal obxectivo do servizo.
O proxecto SmartPeme comezou coa instalación dunha rede de puntos de asesoramento nas diferentes comarcas da provincia, atendidos por asesores cualificados en TIC e novas tecnoloxías. Os destinatarios aos que se dirixe a rede son os autónomos e micropemes provinciais, con prioridade para as que contan con menos de cinco traballadores ou teñen un volume de negocios anual inferior a dous millóns de euros. En total, en Pontevedra existen máis de 64.000 pequenas empresas, que constitúen máis do 92% do tecido empresarial da provincia.
Ignacio Virel, xefe de Proxecto de SmartPeme, explica que o nivel tecnolóxico tanto nas pemes como no colectivo dos autonómos é bastante baixo, polo que este servizo está a supoñerlles unha importante axuda para acceder a un territorio que para moitos aínda é descoñecido, a pesar de que as novas tecnoloxías cada vez están máis presentes na vida das persoas e tamén das empresas. “A nosa aspiración é que o asesor de SmartPeme de cada comarca convértase nunha especie de copiloto tecnolóxico para as empresas e autónomos que asesora”, indica Virel.
Entre os obxectivos que se pretenden alcanzar co uso de SmartPeme por parte dos emprendedores atópanse o aumento da competitividade das pemes mediante o uso de novas tecnoloxías, introducir a innovación dos procesos produtivo nos produtos e servizos das pemes e facilitar a implantación do comercio electrónico entre os autónomos e as micropemes.
Virel explica que a experiencia acumulada ata o de agora con este proxecto demostra que as empresas e autónomos que recorren aos servizos de SmartPeme quedan satisfeitos coa atención recibida. “Este proxecto supón un importante desembolso económico para a Deputación e creo que estamos a conseguir obxectivos porque os emprendedores atópanse cunha situación moi precaria no que se refire ao uso das novas tecnoloxías“, sinala Virel.
Os usuarios de SmartPeme contan cunha bolsa de 10 horas de asesoramento gratuíto
Os usuarios de SmartPeme contan cunha bolsa de 10 horas de asesoramento gratuíto que lles permite dar os seus primeiros pasos nun mundo que é novo para moitos deles. A partir de aí poden pasar a formar parte do servizo SmartPeme Conecta, que lles permite continuar asesorándose. Outro dos servizos que se empezou a ofrecer nos últimos tempos é o de SmartPeme Informa, que permite a pemes e autónomos recibir permanentemente información sobre asuntos relacionados coas novas tecnoloxías que poden chegar a afectarlles, por exemplo a propagación de virus informáticos.
A rede de puntos SmartPeme está composta por seis centros, distribuídos estratexicamente por toda a provincia de Pontevedra. Cada centro conta cun equipo de dous asesores TIC altamente cualificados e coñecedores do tecido empresarial de cada comarca. Ademais do centro coordinador SmartPeme, situado en Pontevedra, o resto de puntos de atención atópanse nas seguintes comarcas:
Comarcas de Pontevedra e O Morrazo
Comarcas do Salnés e Caldas
Comarcas de Deza e Tabeirós-Terra de Montes
Comarcas O Condado e A Paradanta
Comarcas de Vigo e O Baixo Miño
Nestes centros os emprendedores poden atopar resposta a diferentes necesidades, entre as consultas máis habituais atópanse as posibilidades de poñer en marcha unha páxina web propia para un negocio ou comezar a vender a través de internet. Algunhas das dúbidas que atopan resposta nos asesores de SmartPeme son as seguintes:
Como podo aforrar nos gastos de comunicación da empresa?
Que necesito para conectarme a internet?
É seguro operar coa banca online?
Que utilidade ten a sinatura electrónica?
Que me proporciona e que vantaxes ten o comercio electrónico?
Podo xestionar eu mesmo as redes sociais da miña empresa?
Cales son as ferramentas informáticas de xestión?
Como podo emitir facturas electrónicas?
Que subvencións e axudas teño para incorporar ás TIC á miña peme?
Como aplico as novas tecnoloxías ao meu negocio?
Para as empresas e autónomos que xa deron os seus primeiros pasos e necesitan seguir avanzando no mundo das novas tecnoloxías ofrécense actividades que profundan en temas diversos. Como exemplo podemos indicar que nas últimas semanas ofrecéronse talleres sobre como realizar unha campaña de márketing en Google, sobre fotografía e vídeo para establecementos turísticos ou sobre como realizar campañas de promoción dun negocio a través das redes sociais. A utilidade deste tipo de temáticas para calquera negocio é máis que evidente.
Outra das tarefas que se realizan nos puntos SmartPeme é axudar a levar a cabo a tramitación de axudas ou subvencións procedentes das diferentes administracións e entidades. Moitas veces o autónomo ou emprendedor vese inmerso nun oceáno burocrático no que lle resulta moi complicado orientarse e decidirse pola mellor opción para a posta en marcha ou consolidación do seu negocio. Os asesores de SmartPeme poden ser dunha gran axuda para elixir a mellor alternativa e tratar de minimizar o impacto económico que pode ocasionar algunha das solucións suxeridas nos asesoramentos que se realizaron con anterioridade.
Turismo e Agricultura, prioridades cara ao futuro
O xefe de Proxecto de SmartPeme explica que cara ao futuro próximo está previsto ofrecer unha carteira de solucións de novas tecnoloxías e recursos especialmente orientada ao sector turístico, xa que este presenta unhas peculiaridades que é necesario afrontar de forma especializada e é unha área que conta con multitude de pequenas empresas na provincia.
Ademais, tamén está previsto apostar por un maior achegamento ás empresas do sector agrario, unhas das que presentan máis dificultades para achegarse ao emprego das novas tecnoloxías. “Ámbolos dous sectores necesitan solucións moi especializadas e estamos a estudar a mellor forma de dedicar recursos para poder ofrecerllas nun futuro próximo”, indica Virel.
Outra das liñas na que se vai a profundar é a colaboración con asociacións empresariais que agrupan a pemes de diversos sectores e que tamén necesitan este tipo de asesoramento para mellorar a atención aos seus asociados. Cada tres ou catro meses SmartPeme ofrece nalgún dos seus centros unha charla dalgún profesional de prestixio no campo da tecnoloxía.
Varios concellos tamén se puxeron en contacto con SmartPeme para tratar de que as empresas destes municipios poidan beneficiarse dos servizos que se ofrecen. Desta forma, acábanse organizando sesións específicas para presentar o proxecto SmartPeme a un grupo de autónomos e pemes dun concello concreto e, posteriormente, acaban recibindo atención personalizada.
En pouco máis dun ano nos puntos de asesoramento atendéronse preto de 1.200 consultas e realizáronse 435 talleres que contaron cun total de 2.755 asistentes.
