Carmela Silva na apertura do Coworking Barro-Meis. Foto: Anxo Iglesias

Carmela Silva na apertura do Coworking Barro-Meis. Foto: Anxo Iglesias

‘Lideramos o cambio tecnolóxico e apoiamos aos emprendedores’

A presidenta da Deputación de Pontevedra, Carmela Silva, destaca as diversas liñas de actuación para apoiar ao emprendemento na provincia

Ler en castelán
Read in English

A presidenta da Deputación de Pontevedra, Carmela Silva, aposta de forma decidida polo apoio ás iniciativas de emprendemento que nacen na provincia xa que considera que son unha fonte de emprego e de riqueza que é necesario consolidar desde a administración. O talento que atesoura o capital humano que existe en Pontevedra e a favorable contorna cultural, natural e social coa que conta a provincia, convértena, ao seu xuízo nun lugar privilexiado para calquera emprendedor que queira levantar un proxecto empresarial, sexa cal sexa a súa área de actuación.

Carmela Silva. Foto: Anxo Iglesias

Carmela Silva. Foto: Anxo Iglesias

-Cales son as principais liñas de actuación da Deputación á hora de apoiar aos emprendedores?

-Temos moitas liñas de apoio. Contamos no polígono industrial de Barro-Meis con oficinas e naves para viveiros de empresas e os recentemente inaugurados Coworking e Fab Lab. Este tipo de iniciativas permiten emprender novos proxectos empresariais a uns prezos moi por baixo do mercado. Son recursos moi custosos porque os prezos de oficinas e naves son elevados no mercado. Temos tamén a rede SmartPeme que está situada en sete espazos de cada unha das comarcas de Pontevedra, onde se ofertan ás pemes, autónomos e emprendedores información, formación, asesoramento sobre o uso das Tics. Desta forma as empresas que xa existen e as que se van a crear poden obter toda a información necesaria sobre os recursos que poden obter das novas tecnoloxías para que os seus negocios sexan máis eficaces, obtéñanse máis beneficios e póidase crear máis emprego. A partir de febreiro haberá unha nova sede de SmartPeme tamén no polígono de Barro-Meis. Contamos con especialistas nos diversos sectores: turismo, agricultura, cultura, pedra natural, etc. Temos un gran paquete de medidas para tratar de modernizar todos os sectores produtivos da provincia.

-Que obxectivos perseguen coa recente posta en marcha do Coworking e o Fab Lab?

-O principal é conseguir que todas as persoas que teñan unha idea emprendedora na provincia poidan convertela en realidade. O Fab Lab poderano usar todos os que participen no Coworking e calquera emprendedor da provincia que queira usar as novas tecnoloxías para poder desenvolver os seus proxectos. Será un espazo aberto a mulleres e homes para ter todos os instrumentos de innovación que son moi custosos e dos que non poden dispoñer individualmente. Terán as mellores e máis innovadoras tecnoloxías que, ademais, iremos incorporando ao Fab Lab cando vaian xurdindo. Haberá un total de catro edicións do Coworking en dous anos, co que poderán xurdir entre 80 e 100 novos proxectos empresariais.

“Temos unha universidade moi potente que xera coñecemento para ter emprendedores de excelencia”

-Que vantaxes comparativas poden atopar os emprendedores na provincia de Pontevedra?

-Temos unha universidade moi potente que dedica a súa actuación a todo o que ten que ver coa industria e coa creatividade. A Uvigo xera o coñecemento para que a provincia teña emprendedores de excelencia. Temos coñecemento para que se poida crear desde unha industria metalúrxica a unha empresa cultural porque a Universidade cobre todos eses campos. Ademais, a provincia está nunha contorna que conta con empresas punteiras nos diversos sectores: naval, pesca, automóbil. Contamos cun nivel de innovación e de automatización que teñen poucos lugares do mundo. Tamén gozamos dunha contorna natural e cultural privilexiado, cunha traxectoria histórica e co enorme talento que teñen as persoas desta provincia. A todo isto hai que sumar que temos unha mentalidade global porque fomos emigrantes.

-Que papel correspóndelle xogar ás administracións en canto ao apoio ao emprendedor?

-Contamos cunhas administracións, sinto que non sexan todas, que somos conscientes de que o noso papel cambiou e de que debemos liderar o cambio tecnolóxico sendo máis emprendedores e máis proactivos. Nesta provincia hai moito talento que ten que pasar da escuridade á luz e iso tócanos facelo ás administracións. Dedicámonos á política para cambiar a sociedade e, neste caso, iso conséguese ofertando estrutura, espazos e proxectos aos emprendedores que permitan á provincia seguir sendo un lugar con moita actividade económica e con creación de emprego. Somos unha provincia moi potente.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.