Únete á nosa canle de Whatsapp
Técnicos de distintos ámbitos ofreceron a súa visión sobre diferentes aspectos relacionados coa xestión de proxectos no marco das xornada técnica organizada pola Asociación Española de Dirección e Enxeñaría de Proxectos (Aeipro) na Escola Politécnica Superior (EPS) do Campus Terra da USC, onde se puxo de manifesto a importancia da figura e do cometido profesional que desenvolve o director/a de proxecto.
O vicerreitor de Coordinación do campus de Lugo, Javier Bueno, e o coordinador do máster oficial da USC en Dirección de Proxectos, Carlos Amiama Ares, foron os encargados de abrir este foro, que permitiu estreitar aínda máis as ligazóns existentes entre a EPS e a Asociación Española de Dirección e Enxeñaría de Proxectos (Aeipro), que se comprometeu a organizar con certa periodicidade novas accións formativas e de divulgación no centro universitario lugués, no que o próximo ano a USC botará a andar a décima edición do seu máster oficial en Dirección de Proxectos.
A directora de proxectos da empresa Norvento Enerxía, Liliana Grande, abriu a quenda de relatorios desta xornada e foi seguida das intervencións do xefe da área de planificación e infraestructuras do Porto de Vigo, José Enrique Escolar, o capitán do navío e xefe de enxeñaría e Construcións do Arsenal de Ferrol, Gabriel Braña e, por último o delegafo de Eptisa para Galicia e Asturias, Vicente Alcón Vidal.
