TodoCosmos

O programa TodoCosmos de divulgación astronómica celebrou un cento de actividades no 2016

Durante 2016, o Observatorio Astronómico Ramón María Aller da USC desenvolveu a través da terceira edición do programa TodoCosmos un cento de actividades divulgativas en toda Galicia arredor da astronomía. Financiado por terceiro ano consecutivo pola Fundación Española para a Ciencia e a Tecnoloxía (FECYT) e co apoio de Óptica Val, a filosofía deste programa é trasladar a divulgación astronómica a todos os lugares nos que sexa demanda, explica o seu director, o profesor José Ángel Docobo. Neste senso, o propio Docobo lembra como deste xeito e dende hai varios anos, o Observatorio da USC complementa a súa misión investigadora e docente coa de “centro de interpretación dos cosmos, dando servizo a amplos sectores da sociedade”.

En 2016, a colaboración con TodoCosmos estendeuse  oficialmente a quince concellos de Galicia (Allariz, Ames, Boqueixón, Lalín, Noia, Ordes, Oroso, Padrón, Rianxo, Ribadeo, Santiago de Compostela, Sanxenxo, Teo, Vedra e Vila de Cruces), se ben puntualmente tamén se levaron a cabo actividades noutros sete (Arteixo, Barbadás, Carral, Melide, Porto do Son, Tordoia e Vilar de Santos). No propio Observatorio realizáronse sesións para colexios e grupos non só de Santiago senón tamén de Vigo, Estremadura, Sartrouville (Francia), Tordoia, Padrón, Bueu, Altea (Alacante), A Estrada e Boiro. No caso concreto de Santiago, José Ángel Docobo destacou o importante volume de iniciativas desenvolvidas como as múltiples visitas guiadas e sesións didácticas ou a celebración do Mes da Astronomía, que se imparte ao longo do mes de novembro na Biblioteca Anxel Casal.

Como explica o docente, o bo tempo reinante en Galicia dende finais de xuño favoreceu o desenvolvemento de todas as actividades programadas en paseos marítimos (Sanxenxo, Rianxo, Noia), cimas emblemáticas e miradoiros (Pico Sacro, Alto da Agrela, Alto de San Marcos, Gundián ou Monte Xalo), paseos fluviais (Bertamiráns e Insua- A ponte), prazas céntricas (Allariz, Barbadás, Milladoiro, Ribadeo, Vila de Cruces, Tordoia, Padrón, Porto do Son,…), observatorios  (Lalín e Santiago),  parroquias, escolas unitarias, centros de ensino non universitario, fundacións públicas, centros de rehabilitación ou institucións penitenciarios. Na actualidade, explica Docobo, “son xa numerosos os concello que teñen solicitado adherirse a esta iniciativa didáctica de cara a 2017”. O equipo docente que participa en TodoCosmos está constituído por José Angel Docobo, Pedro Pablo Campo, María Brea, José Ramón González e Jorge Gómez.

Deixar unha resposta

XHTML: Podes empregar estas etiquetas: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>

POLÍTICA DE COMENTARIOS:

GCiencia non publicará comentarios ofensivos, que non sexan respectuosos ou que conteñan expresións discriminatorias, difamatorias ou contrarias á lexislación vixente.

GCiencia no publicará comentarios ofensivos, que no sean respetuosos o que contentan expresiones discriminatorias, difamatorias o contrarias a la ley existente.