O campus de Ourense acolle hoxe e mañá unha nova edición das Xornadas de Enfermaría de Ourense, que este ano celebran a súa décimo primeira edición. Nesta ocasión serán máis de 300 os profesionais da enfermaría de toda a provincia que se darán cita nunhas xornadas que terán como lema central “Liderando coidados para adaptarse ás novas realidades sociais”. O encontro, organizado pola Dirección de Procesos de Enfermaría da Xerencia de Xestión Integrada de Ourense, terá lugar coincidindo coa celebración do Día Internacional deste colectivo profesional e serve para difundir traballos de investigación publicados ou presentados ao longo deste ano en congresos ou simposios autonómicos, estatais e internacionais.
O lema deste ano quere destacar a responsabilidade dos coidados dos pacientes crónicos, non só os pluripatolóxicos e de idade avanzada, que en Ourense supoñen un elvado volumen de pacientes, senón tamén naqueles que padecen unha enfermidade crónica, desde a súa infancia ou adolescencia. O congreso conta cun amplo programa de mesas redondas e comunicacións a cargo de profesionais e investigadores deste eido. Os traballos que se exporán nas mesas redondas abordarán cuestións como a actualización en marcapasos, a mobilización do paciente hemipléxico, a automatización no manexo de mostras biolóxicas, a atención integral ao paciente crónico, o paciente con inflamatoria intestinal ou os coidados paliativos.