Galicia deseña o arrastreiro do futuro

O prototipo do futuro arrastreiro de gran altura está listo para navegar

A frota arrastreira conxeladora galega de gran altura quedou obsoleta. Integrada na súa maioría por buques que superan os 30 anos de antigüidade, perdeu boa parte da súa competitividade. Acabar con esta situación e volver situarse á cabeza da eficacia mundial é o obxectivo do proxecto Aralfutur, cuxos primeiros resultados están a piques de empezar a verse. Ao longo do mes de xaneiro está previsto que o prototipo do que será o arrastreiro do futuro realice os seus primeiros ensaios na Canle de Experiencias do Pardo. Os investigadores están a dar os últimos retoques ás maquetas antes de iniciar as probas.