Únete á nosa canle de Whatsapp
Máis de 60 investigadores de todo o mundo daranse cita entre os días 1 e 3 de febreiro en Santiago para tratar a relevancia social e literaria que adquiriron as mulleres, especialmente a partir do século XII. A inscrición no congreso internacional ‘A presenza feminina na escritura. Voces de mulleres na Idade Media’, recoñecida cun crédito ECTS para estudantes de grao da USC e como actividade formativa do doutoramento en ‘Estudos Medievais’, remata o 30 deste mes.
A investigación sobre a importancia da muller medieval foi tradicionalmente marxinada nos estudos clásicos, supeditada á maior transcendencia histórica dos varóns. Non obstante, existen mulleres de diferente condición que ocuparon unha posición relevante e que contaron cunha produción literaria, artística ou filosófica que aínda non experimentou unha valorización positiva nin un interese semellante ao suscitado polos homes. Por esta razón, co encontro proponse analizar a feminidade xenética e/ou textual, presente tanto nos textos literarios como na documentación medieval. Estudaranse, en particular, voces femininas relevantes como Marie de France ou Christine de Pizan e presentaranse recursos dixitais de referencia sobre os estudos das voces de mulleres na Idade Media, tanto desde o punto de vista histórico como literario.
A reunión científica, cuxo comité organizador dirixe a profesora da USC Esther Corral Díaz, enmárcase dentro do proxecto de investigación ‘Voces de mujeres en la Edad Media Románica: realidad y ficción (siglos XII-XIV)’ (MINECO-FFI-2014-55628-P) e, ademais de dar cabida a relatorios impartidos por especialistas de referencia no ámbito internacional, ofrecerá un foro de difusión para a presentación de comunicacións do persoal investigador das áreas dos estudos humanísticos.
