Únete á nosa canle de Whatsapp
A presenza por segundo ano consecutivo da USC entre as mellores universidades do mundo segundo o ránking Times Higher Education 2017 (THE) converte a Universidade compostelá nunha das dez universidades españolas presentes simultaneamente nos tres principais ránkings internacionais, xunto con ARWU (Academic Ranking of World Universities) e QS World University Ránking, actualizados o pasado mes de agosto e en setembro, respectivamente.
Do total das preto de trinta universidades españolas referenciadas nalgún destes ránkings, as dez referenciadas de xeito simultáneo nos tres máis importantes son Autónoma de Barcelona, Autónoma de Madrid, Barcelona, Complutense, Granada, Politécnica de Cataluña, Politécnica de Valencia, Pompeu Fabra, Valencia e a USC.
Santiago de Compostela, por segundo ano consecutivo, é unha das 27 universidades españolas presentes no ránking Times Higher Education 2017, listaxe das 980 mellores universidades do mundo. Esta clasificación internacional preséntase como “á unica táboa de clasificación internacional máis grande ata o momento. É a única clasificación do rendemento global das institucións universitarias a través das súas misións básicas: docencia, investigación, transferencia de coñecemento e proxección internacional”.
Os aspectos mellor valorados da USC son os relativos á súa proxección internacional, citacións científicas ou influencia investigadora e transferencia de coñecemento. Paralelamente experimenta unha mellor nos datos relativos a volume, ingresos e reputación en investigación. Para a súa elaboración, ademais da análise dos datos de produción científica das distintas universidades avaliadas, tómanse en consideración os resultados dunha enquisa a académicos arredor do mundo.
