Únete á nosa canle de Whatsapp
A Academia de Farmacia de Galicia entrega este mércores ás 19.00 horas na súa sede do Antigo Hospital de San Roque os premios Antonio Casares Rodríguez e Julián Francisco Suárez Freire, uns galardóns que buscan abrir un espazo para o recoñecemento dos estudantes e investigadores novos que desenvolven a súa actividade en Galicia e que nesta ocasión corresponderon a rapaces e rapazas da USC.
A entrega ten lugar no acto académico de apertura do curso, que estará presidida por Manuel Puga Pereira, presidente da institución, e na que o académico de Número Ramón Martínez Pacheco pronunciará a conferencia ‘Medicamentos, tabaco e alcol. Interaccións farmacocinéticas e repercusións clínicas’.
O Premio Antonio Casares Rodríguez patrocinado polos Colexios Oficiais de Farmacéuticos de Galicia correspondeulle a Elia Alvarez Coiradas, que finalizou o grao en Farmacia co mellor expediente académico no curso 2014/2015.
Pola súa banda, o Julián Francisco Suárez Freire, que patrocinan as cooperativas farmacéuticas COFAGA e COFANO dirixido a investigadores menores de 35 anos, foi para Anxo Fernández Ferreiro por un traballo publicado na revista European Journal of Pharmaceutics and Biopharmaceutics sobre seguridade ocular e tempo de permanencia na superficie ocular de xeles sensibles a ións. O estudo é froito dunha colaboración de varios grupos da USC e do IDIS-ISCIII do SERGAS.
Ademais, entregarase un diploma de excelencia a unha investigación sobre impresión 3D de medicamentos presentado por Álvaro Goyanes Goyanes e publicada en Molecular Pharmaceutics.
