Únete á nosa canle de Whatsapp
Varios pequenos terremotos están a sacudir Galicia nos últimos días. O Instituto Xeográfico Nacional rexistrou unha sucesión de pequenos sismos, que suman un total de 16 nos últimos 30 días. A última cadea estivo formada por catro sismos nos últimos días, que afectaron a zonas Lugo e Ourense.
Entre os rexistrados nas últimas horas, o primeiro sucedeu no concello de Triacastela, zona habitual de sismos, con 2,7 na escala de Richter ás 11 da mañá do pasado xoves. E o domingo houbo tres movementos detectados polos sismógrafos. A xornada dominical amenceu cun pequenos terremoto de 2,5 na escala Ritcher en Becerreá, ás 08.30 horas cunha réplica ás 10.30 horas. A provincia de Ourense tamén tremeu onte cun sismo de menor magnitude que os anteriores, concretamente de magnitude 2,1 ás 11.59 horas do sábado.
O último movemento sísmico rexistrado o domingo tivo lugar no concello lucense de Guntín cun sismo de 2,3 na escala Ritcher. Polo momento non hai constancia de que fose sentido pola poboación destas localidades.
No que vai de mes, Galicia acumula dezaséis sismos rexistrados polo Instituto Xeográfico Nacional. O máis forte deles foi rexistrado no mar, á altura de Estaca de Bares e foi o único que superou o 3 na escala de Ricther.
Cada ano prodúcense ducias de terremotos en Galicia, pero a gran maioría teñen magnitudes moi pequenas e son imperceptibles para a poboación porque se producen a máis de 10 quilómetros baixo terra. Nalgúns casos o seu epicentro localízase a máis de 20 quilómetros de profundidade. Os sismos que pasan case desapercibidos para as persoas son os que non alcanzan os 2,9 graos na escala de Richter. A partir desa cifra móvense os obxectos colgados e a maioría das persoas poden sentilos.
