Venres 29 Marzo 2024

Xestión sustentable e apoio á biodiversidade para loitar contra os incendios

A Escola Politécnica Superior de Enxeñaría do Campus Terra da USC lidera en Galicia o Open2Preserve, un proxecto europeo que acaba de recibir 1,7 millóns de euros de financiamento dos fondos Feder. O programa, que compoñen máis de 30 socios de España, Francia e Portugal, está orientado a proporcional modelos de xestión sustentable do monte que contribúan a minimizar o risco de lumes forestais, ademais de garantir a preservación dos servizos ecosistémicos e a calidade ecolóxica dos espazos abertos de montaña de alto valor ambiental susceptibles de ameazas.

A coordinadora do proxecto do Campus Terra é a catedrática do Departamento de Produción Vexetal e Proxectos de Enxeñaría da USC e profesora na Escola Politécnica Superior de Enxeñaría Rosa Mosquera Losada, que cifrou en arredor de 400.000 euros a partida económica dispoñible para o financiamento das distintas actuacións proxectadas na provincia de Lugo e no resto da xeografía galega ao abeiro deste proxecto transnacional.

Publicidade

O proxecto figura entre as 8 propostas aprobadas entre máis de 400 solicitudes

Mosquera salienta a pertinencia das medidas propostas polos promotores do Open2Preserve, logo de que este proxecto figure entre as 8 propostas aprobadas para o seu financiamento das máis de 400 solicitudes presentadas inicialmente á última convocatoria de fondos europeos. Rosa Mosquera, que tamén presidenta é da Federación Europea de Sistemas Agroforestais (EURAF) lembrou neste senso que os obxectivos fixados no Open2Preserve coinciden en gran medida coas necesidade xa advertidas nos espazos abertos de montaña das rexións do suroeste de Europa, zonas que están inmersas nos procesos de cambio global relacionados coas modificación do uso da terra e co cambio climático que afecta ao planeta.

A redución do pastoreo por herbívoros e o abandono dos usos tradicionais das terras nas últimas décadas están a provocar a homoxeneización da paisaxe e un descenso da biodiversidade dos seus hábitats, ao tempo que se produce unha elevada acumulación de combustible vexetal, o que implica un incremento dos riscos de lumes forestais, relatou Rosa Mosquera.

Outra das achegas á que aspiran os socios promotores do programa Open2Preserve está estreitamente relacionada coa loita contra os efectos do cambio climático, segundo precisou a catedrática da USC Rosa Mosquera, quen tamén coordina a división de cultivos da Alianza Científica Global contra as Emisións de Gases de Efecto Invernadoiro Agrícolas, institución recoñecida como observadora oficial do Panel Intergubernamental do Cambio Climático (IPCC) e que participa na Alianza Global para a Agricultura Climaticamente Intelixente.

Daquela, o proxecto Open2Preserve, un proxecto transnacional que botará a andar en primavera logo da asemblea constitutiva que se celebrará nas vindeiras semanas na cidade francesa de Toulouse, busca definir novas estratexias para ofrecer solucións innovadoras que aseguren a sustentabilidade económica e a viabilidade a longo prazo do modelo de xestión, promovendo a creación de novos empregos e o desenvolvemento sostible da rexión.

1 comentario

DEIXAR UNHA RESPOSTA

Please enter your comment!
Please enter your name here

Este sitio emprega Akismet para reducir o spam. Aprende como se procesan os datos dos teus comentarios.

Relacionadas

Cales foron as causas da seca que precedeu aos incendios de Australia? Un equipo de Ourense ten a clave

A investigadora Milica Stojanovic, do grupo EphysLab da UVigo, centrou o seu traballo en analizar as fontes de humidade da zona

Gciencia celebra o Día da Lingua Materna cun relatorio sobre a divulgación en galego

A xornalista Laura Filloy abordou a importancia de trasladar o coñecemento científico á sociedade nun acto celebrado no Campus de Lugo da USC

Atopado o talón de Aquiles da rata toupa, a praga que azouta a montaña luguesa

O estudo do órgano vomeronasal deste mamífero subterráneo avala o uso de químicos para diminuír a súa poboación e frear o seu impacto na agricultura

As cinzas dos lumes de 2017 poden causar alteracións no plancto costeiro da Vigo

O estudo realizado por investigadores do CIM da Universidade de Vigo centra a súa investigación na escorredura posterior ás queimas